‘भिजिबिलिटी’ नै कम हुने गरि बाक्लो तुवाँलोले विमानस्थल क्षेत्र ढाकेका कारण बिहीबार बिहानैदेखि त्रिभुवन अन्तर्राष्ट्रिय विमानस्थलका उडान अवतरण प्रभावित बनेका छन् ।
त्रिभुवन विमानस्थल कार्यालयका अनुसार अहिले ‘आइएफआर’ प्रविधिबाट उडान अवतरण गर्नुपर्दा जहाजको व्यवस्थापन ढिला भइरहेको छ ।
बिहिबार बिहान निर्धारित धेरैजसो उडान प्रभावित भएका थिए । अहिले पनि आकाशमा केही फन्को मारेपछि मात्र जहाजहरू अवतरण भइरकेका छन् ।
बिहानका पाँच वटा माउन्टेन फ्लाइट काठमाडौँबाट उडे पनि भिजिबिलिटी कम हुँदा अवतरण गर्न नसकेपछि अन्य विमानस्थलमा डाइभर्ट भएका छन् ।
विमानस्थलका अनुसार बुद्ध एयरका तीन वटा माउन्टेन फ्लाइटमध्ये दुइटा भैरहवा र एउटा जनकपुर डाइभर्ट भएका छन् । यती एयरलाइन्स र श्री एयरलाइन्सका एक–एक माउन्टेन फ्लाइट भैरहवा डाइभर्ट भएका छन् ।
