आजदेखि त्रिभुवन अन्तर्राष्ट्रिय विमानस्थल दैनिक १८ घण्टा सञ्चालनमा आउने भएको छ । नेपाल नागरिक उड्डयन प्राधिकरण (क्यान)ले आजदेखि त्रिभुवन अन्तर्राष्ट्रिय विमानस्थल दैनिक १८ घण्टा सञ्चालन गर्न लागेको हो ।
कात्तिक २३ गतेदेखि स्तरोन्नतिका लागि घटाइएको विमानस्थलको सञ्चालन अवधि मार्च ३१ अर्थात् चैत १८ गते सोमबारसम्म दैनिक १४ घण्टा मात्रै थियो । विमानस्थलको स्तरोन्नति कार्य आंशिक रूपमा सम्पन्न भएसँगै अब दैनिक १८ घण्टा सञ्चालनमा आउने भएको हो ।
क्यानले सोही अनुसार समर सिजनको फ्लाइट सेड्युलसमेत निर्धारण गरेको छ ।
त्रिभुवन अन्तर्राष्ट्रिय विमानस्थल कार्यालयका प्रमुख जगन्नाथ निरौलाका अनुसार अब काठमाडौं विमानस्थल बिहान ६ बजे खुल्नेछ भने राति १२ बजे बन्द हुनेछ । यसअघि विमानस्थलको सञ्चालन अवधि बिहान ८ बजेदेखि बेलुकी १० बजेसम्म रहेको थियो ।
तर, स्तरोन्नति सुरु हुनुअघि विमानस्थल राति साढे २ बजेसम्म सञ्चालन हुँदै आएको थियो ।
