धावनमार्ग मर्मतका लागि रातको समयमा बन्द हुँदै आएको त्रिभुवन अन्तर्राष्ट्रिय विमानस्थल अब बन्द नहुने भएको छ । अहिले रातको समयमा पूर्ण रुपमा विमानस्थल बन्द गरेर धावनमार्ग मर्मतको काम भइरहे पनि अब चैत १९ गतेबाट भने विमानस्थल बन्द नहुने भएको हो ।
त्रिभुवन अन्तर्राष्ट्रिय विमानस्थलका महाप्रबन्धक जगन्नाथ निरौलाका अनुसार अब ट्याक्सीवेको मर्मतका क्रममा अप्रिल १ देखि उडान अवतरण रोकिने छैन ।
अप्रिलदेखि जहाजहरुको उडानमा समर सेड्युल सुरु भएसँगै विहान ६ बजेदेखि राति १२ बजेसम्म विमानस्थल चल्ने छ । अब दैनिक १८ घण्टा विमानस्थल सञ्चालन हुने महाप्रबन्धन निरौलाले जानकारी दिएका छन् ।
यसअघि नियमित समयमा त्रिभुवन अन्तर्राष्ट्रिय विमानस्थलमा विहान ३ बजेसम्म नै उडान हुने थियो । अब हाललाई रातको १२ बजेसम्म विमानस्थल खुल्ने छ ।
यद्यपी, ट्याक्सीवे मर्मतको सबै काम सम्पन्न गर्न डेढ वर्षभन्दा बढी समय लाग्ने जनाइएको छ ।
नयाँ एयरलाइन्सको उडान पनि थप हुँदै
समर सेड्युल सुरु हुनासाथ नेपालमा दुई वटा नयाँ अन्तर्राष्ट्रिय वायुसेवाको उडान थप हुने भएको छ । एयर इन्डिया एक्सप्रेस र स्पाइसजेटले काठमाडौँमा उडान गर्न लागेका हुन् ।
भारतीय वायुसेवा कम्पनी स्पाइसजेट कोभिड अगाडि नेपालमा नियमित उडान गर्ने कम्पनी हो । तर, कोभिडपछि राकिएको उडान समर सेड्युलदेखि पुनः सुरु गर्न लागेको हो ।
एयर इण्डिया एक्सप्रेस भने पहिलोपटक नेपाल आउन लागेको हो ।
यी दुबै एयरलाइन्सले दिउँसोको समयका लागि स्लट पाइसकेका छन् ।
यस्तै, हाल हप्तामा ४ वटा उडान गर्दै आएको क्याथे प्यासिफिकसले पनि अब दैनिक उडान गर्ने भएको छ ।
