भैरहवास्थित गौतमबुद्ध अन्तर्राष्ट्रिय विमानस्थलबाट फेब्रुअरी महिनामा ११५ अन्तर्राष्ट्रिय उडान तथा अवतरण भएका छन् । यसमार्फत कुल ६ हजार ७७९ यात्रुले सेवा लिएको विमानस्थलले जनाएको छ ।
विमानस्थलका महाप्रबन्धक प्रतापबाबु तिवारीका अनुसार जजीरा एयरवेजमार्फत ३ हजार २६५ जना, फ्लाई दुबईमार्फत २ हजार ४०३ जना र थाई एयरमार्फत १ हजार ९७ यात्रुले गौतम बुद्ध अन्तर्राष्ट्रिय विमानस्थलबाट सेवा लिएका छन् । यस्तै, यस महिनामा १३ चार्टर उडानसमेत भएको उनको भनाइ छ ।
ति उडानमार्फत सेवा लिने यात्रुहरुमा २११ जना विदेशी यात्रु छन् ।
यस्तै, त्रिभुवन विमानस्थलसँग जोडिएर उडान गर्ने नेपाल एयरलाइन्स र फ्लाई दुबईमा ४ हजार ४० ट्रान्जिट यात्रुहरुले यात्रा गरेको महाप्रबन्धक तिवारीले जानकारी दिएका छन् ।
नोभेम्बर २०२४ बाट उडान भएयता २०२५ फेब्रुअरी महिनामा भएको यात्रु आवागमन अहिलेसम्मकै धेरै रहेको समेत उनको भनाइ छ । जनवरी २०२५ मा यस विमानस्थलबाट १ हजार ३६५ र डिसेम्बर २०२४ मा ३ हजार ८७८ यात्रुले सेवा लिएका थिए ।
