भैरहवास्थित गौतमबुद्ध अन्तर्राष्ट्रिय विमानस्थलमा पुनः अन्तर्राष्ट्रिय उडान सुरु भएको छ । यसअघि खराब मौसमका कारण उडान रोकेका एयरलाइन्सले पुनः उडान सुरु गर्न थालेका हुन् ।
गौतमबुद्ध अन्तर्राष्ट्रिय विमानस्थलका महाप्रबन्धक प्रतावबाबु तिवारीका अनुसार तीन एयरलाइन्सहरुले नियमित रुपमा अन्तर्राष्ट्रिय उडान सुरु गरेका छन् । अहिले विमानस्थलबाट फ्लाई दुबई, थाई एयर र जजिरा एयरलाइन्सले नियमित उडान थालेका छन् ।
यस विमानस्थलबाट फ्लाई दुबईले दैनिक उडान गरिरहेको छ भने थाईले साताको दुई दिन सोमबार र बिहीबार उडान गर्दै आएको छ । जजिराले मंगलबार, बिहीबार र शनिबार उडान गर्दै आएको छ ।
यसैबीच, गौतमबुद्ध अन्तर्राष्ट्रिय विमानस्थलबाट उडान गर्ने यात्रुहरुको भाडा ३ हजार रुपैयाँ सस्तो भएको छ । २०८३ भदौ मसान्तसम्मको लागि पोखरा र गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडानमा हवाई टिकटमा लगाउने गरिएको ३ हजार रुपैयाँ यात्रु शुल्क पूर्णरुपमा छुट गरेकाले भाडा घटेको हो ।
