सरकारले भैरहवा र पोखरा अन्तर्राष्ट्रिय विमानस्थलको यात्रु शुल्क छुट दिन गरेको निर्णय कार्यान्वयनमा आएको छ । मन्त्रिपरिषदको साउन २८ गतेको बैठकले पोखरा र भैरहवा अन्तर्राष्ट्रिय विमानस्थल सञ्चालन गर्ने कार्यविधि स्वीकृत गरेको ६ महिनापछि कार्यान्वयनमा आएको हो ।
मन्त्रिपरिषद बैठकले अन्तर्राष्ट्रिय उडान गर्ने एयरलाइन्सहरुलाई आकर्षण गर्न स्वीकृत गरेको कार्यविधिमा २०८३ भदौ मसान्तसम्म पोखरा र गौतमबुद्ध अन्तर्राष्ट्रिय विमानस्थलबाट अन्तर्राष्ट्रिय उडानमा हवाई टिकटमा लगाउने गरिएको ३ हजार रुपैयाँ यात्रु शुल्क पूर्णरुपमा छुट गर्ने उल्लेख छ ।
यसअघि उक्त कार्यविधि स्वीकृत भएको मितिले ७ दिनभित्रमा कार्यान्वयन गर्ने भनिएपनि बल्ल कार्यान्वयनमा आएको हो ।
संस्कृति, पर्यटन तथा नागरिक उड्डयन मन्त्रालयका सचिव विनोदप्रकाश सिंहका अनुसार यात्रु सेवा शुल्क हटाउने निर्णय कार्यान्वयनमा आएसँगै अब यी विमानस्थलबाट अन्तर्राष्ट्रिय उडान गर्ने यात्रुहरुको भाडा ३ हजार रुपैयाँ घट्नेछ ।
