रिकण्डिशन हाउसहरुमा सेकेन्ड ह्याण्ड विद्युतीय गाडीहरु बढ्न थालेका छन् । तर, सहज फाइनान्सिङ सुविधा नहुँदा सेकेन्ड ह्याण्ड ईभीको बिक्री कम हुने गरेको व्यवसायीहरुको भनाई छ । रिकण्डिशन व्यसायीहरुका अनुसार सेकेन्ड ह्याण्ड ईभीमा बैंक तथा वित्तीय संस्था र हायर पर्चेज कम्पनीहरुले फाइनान्सिङ गर्दैनन् । जसका कारण बजारमा नयाँ ईभीको बिक्री बढिरहे पनि सेकेन्ड ह्याण्ड ईभीको बिक्री भने निराशाजनक नै रहेको उनीहरुको भनाइ छ ।
नेपाल रिकण्डिसन अटो व्यवसायी संघका अध्यक्ष रमेश कोइरालाका अनुसार रिकण्डिशन हाउसहरुले नियमित कारोबार गर्ने र चिनजानका संस्थाले मात्रै अहिले सेकेन्ड ह्याण्ड ईभीको फाइनान्सिङ गरिरहेका छन् । ‘भ्यालूएशन पनि आफैँ गर्नुपर्ने अवस्था छ, मुख्य समस्या चाहिँ फाइनान्सिङकै हो’ उनले भने, ‘चिनजान, रिलेशनका आधारमा काम गर्नुपर्ने बाध्यता छ ।’
टाटा र बिवाईडीमा सहज
संघका वरिष्ठ उपाध्यक्ष राजकुमार देवकोटाका अनुसार ईभीको सेकेन्ड ह्याण्ड बजार विस्तार हुन नसक्नुमा ‘भ्यालूएशन’ र ‘फाइनान्सिङ’ मुख्य समस्याका रुपमा देखिएका छन् । ‘ईभी ब्राण्ड धेरै आए, तर तिनको पार्टस् र मेन्टेनेन्सको ग्यारेन्टी भएन’ उनी भन्छन्, ‘ब्याट्री पनि कति वर्षमा फेर्नुपर्ने हो र फेर्दा कति खर्च लाग्छ भन्ने यकिन छैन । सबैका आ–आफ्नै तर्क मात्रै छन् ।’
उनका अनुसार विश्वासिलो आयातकर्ताले ल्याएका बाहेक अन्य ईभी गाडीहरु सेकेन्ड बजारमा बिक्री गर्न सकस छ । ‘सप्लाई बढ्न खोजेको छ, तर डिमाण्ड कम छ’ देवकोटाले थपे, ‘अहिले रिकण्डिशन हाउसहरुमा २ प्रतिशत पनि ईभी छैनन् । जति छन्, ति स्तरीय र विश्वासिला ब्राण्डका मात्रै छन् ।’
उनका अनुसार नेपालमा लामो विरासत बोकेको कम्पनीले आयात गरेका र विश्वासिला ब्राण्डमा हायर पर्चेज कम्पनीले फाइनान्सिङ गर्छन् । टाटा र बिवाईडीका सेकेन्ड ह्याण्ड ईभीमा फाइनान्सिङ सहज नै रहेको व्यवसायीहरु बताउँछन् ।
‘नयाँ गाडी धेरै सेल गरेका टाटा र बिवाईडीका ईभीहरु अहिले सेकेन्ड ह्याण्ड बजारमा अलि धेरै आउन थालेका छन् । हुलास र एमएडब्ल्यू हायर पर्चेजबाट यी ब्राण्डका सेकेन्ड ह्याण्ड ईभीमा फाइनान्सिङ भइरहेको छ’ एक अर्का व्यवसायी भन्छन्, ‘हुन्डाई र एमजी पनि आउन थालेपछि यीनिहरुमा पनि समस्या हुँदैन । हायर पर्चेज कम्पनीहरुले फाइनान्सिङ गर्दा ब्राण्ड र आयातकर्ता कम्पनीलाई हेर्ने गरेका छन् ।’
चावहिलस्थित एक रिकण्डिशन हाउसका सञ्चालकका अनुसार टाटा र बिवाईडी ‘टेस्टेड’ ब्राण्ड भएकाले हायर पर्चेज कम्पनीहरुले यी ब्राण्डमा सहजै फाइनान्सिङ गर्ने नीति लिएका छन् ।
सहकारीबाट ‘हायर पर्चेज’तर्फ ‘सिफ्ट’ हुँदै कारोबार
अहिले हायर पर्चेज कम्पनीले स्थापित ब्राण्डका सेकेन्ड ह्याण्ड ईभीमा फाइनान्सिङ गर्न थालेपछि व्यवसायीहरुले केही सहज महशुस गरेका छन् । यसअघि सहकारी संस्थामार्फत फाइनान्सिङ गराउन बाध्य रहेका व्यवसायीहरु अब क्रमशः हायर पर्चेज कम्पनीबाटै फाइनान्सिङ हुन थाल्नेमा विश्वस्त देखिएका छन् ।
‘बैंक र फाइनान्सिङ कम्पनीले रिकण्डिशनबाट बिक्री हुने ईभीमा फाइनान्सिङ नगर्दा सहकारीमार्फत कारोबार गर्नुपर्ने बाध्यता थियो’ एक जना व्यवसायी भन्छन्, ‘सहकारीसँग सेकेण्ड ह्याण्ड ईभीको भ्यालूएशन गर्ने मेकानिजम थिएन । ब्याज पनि महँगो हुन्थ्यो । अब अलि सहज हुन थालेको छ ।’
