काठमाडौँको ‘रिङ– रोड’मा सार्वजनिक यातायात सेवा दिँदै आएको महानगर यातायात प्रा.लि.ले असार ३२ गतेबाट विद्युतीय बस सञ्चालनमा ल्याउने भएको छ । कम्पनीले असार ३२ गतेबाट १२ वटा ठूला विद्युतीय बस सञ्चालनमा ल्याउन लागेको हो ।
प्रा.लि.बाट पब्लिक कम्पनीमा रुपान्तरण हुने र सर्वसाधारणलाई समेत आईपीओ निष्काशनको तयारीमा रहेको कम्पनीले १२ वटा विद्युतीय बस सञ्चालनमा ल्याउन लागेको हो । कम्पनीका अध्यक्ष शन्तोष खतिवडाका अनुसार पहिलो चरणमा १२ वटा ठूला विद्युतीय गाडी सञ्चालनमा ल्याउन लागिएको हो ।
महानगर यातायातले सञ्चालनमा ल्याउन लागेका विद्युतीय बसको उद्घाटन भौतिक पूर्वाधार तथा यातायात मन्त्री देवेन्द्र दाहालले गर्ने तय भएको छ ।
चेरी वन्डाले बनाएका यी बसले एकपटक ६८ जनासम्म यात्रु बोक्ने छन् । १४४.९२ किलोवाट आवर क्षमताको ब्याट्री प्याकमा आएका यी गाडीहरु एक पटकको फूल चार्जमा ३९२ किलोमिटर कुद्ने जनाइएको छ । कम्पनीले कलंकीमा चार्जिङ स्टेशन पनि बनाइरहेको छ ।
यी बसको ग्राउण्ड क्लियरेन्स ३८५ एमएम छ ।
