म्याक्ससको ‘ई टेरोन–९’ इलेक्ट्रिक पीकअप नेपाली बजारमा आधिकारिक रुपमा सार्वजनिक भएको छ । नेपालका लागि म्याक्ससको आधिकारिक बिक्रेता हिमालयन मोट्रक्सले मनाङस्थित ३५१९ मिटर उचाईमा ‘ई टेरोन–९’ इलेक्ट्रिक पीकअप सार्वजनिक गरेको हो ।
कम्पनीका अनुसार नेपालमै पहिलो पटक उच्च भू–भागमा लक्जरी इलेक्ट्रिक फोरह्वील म्याक्सस ई–टेरोन ९ पीकअप सार्वजनिक भएको हो । पीकअप सार्वजनिकसँगै ‘एअर सस्पेन्सन’को सफल प्रदर्शन पनि गरिएको छ ।
हिमालय अर्गनाइजेसन अन्तर्गतको हिमालय मोट्रक्स प्रा.लि.ले नेपालमै पहिलो पटक हिमालको काखमा पीकअप सार्वजनिक गरेको हो । यसबाट नेपालको विद्युतीय सवारी साधन यात्रामा नविनतम आयाम थप भएको कम्पनीको विश्वास छ ।
म्याक्सस इ–टेरोन ९ पीकअपलाई काठमाडौंदेखि मनाङसम्मको यात्रासहित मनाङमा भव्य कार्यक्रमबीच सार्वजनिक गरिएको छ । ३,५१९ मिटर (११,५४५ फिट) उचाइमा अवस्थित मनाङ जिल्लामा आयोजित कार्यक्रमले नेपालको जस्तोसुकै विकट भौगोलिक संरचनामा पनि यो विद्युतीय सवारीसाधन उपयुक्त छ भन्ने कुरा प्रमाणित गरेको कम्पनीले जनाएको छ ।
एग्रेसिभ लुक भएको यो पीकअप नेपालमा आयात हुने कुनै पनि अन्य पिकअप भन्दा हरेक कुरामा अब्बल रहेको कम्पनीको दाबी छ।
किन मनाङमा गरियो सार्वजनिक ?
हिमालय मोट्रक्सले म्याक्सस ई–टेरोन ९ को लन्चिङका लागि मनाङ छानेको हो । मनाङमा म्याक्सस पीकअप सार्वजनिक गर्ने निर्णय केवल एक स्थल चयन मात्र नभई विद्युतीय सवारीका क्षेत्रमा भएको नविनतम आयामको प्रदर्शनका लागि यो एक सन्देश पनि भएको जनाइएको छ ।
कठोर हिमाली भूभाग, चट्टानी बाटो र उच्च उचाइका कारण मनाङ नेपालकै चुनौतीपूर्ण अफरोड क्षेत्रमध्ये एक हो । यस्तो स्थानमा सफल परीक्षण र प्रदर्शन गरेर, कम्पनीले यो विद्युतीय पिकअपको डुअल मोटर फोरविल प्रणाली, एडप्टिभ एअर सस्पेन्सन र सम्पूर्ण भू–भागमा सहज संचालन क्षमताको प्रमाण प्रस्तुत गरेको छ ।
शहरी सडकदेखि हिमाली बाटासम्म सहजै संचालन गर्न डिजाइन गरिएको म्याक्सस ई–टेरोन ९, नेपालकै पहिलो लक्जरी इलेक्ट्रिक पीकअप हो । जसमा एडजस्टेबल एअर सस्पेन्सन समावेश छ ।
उच्चतम् गति १९० किलोमिटर प्रतिघण्टा रहेको यस पीकअपमा सेग्मेन्टकै ठूलो साइजको ब्याट्री प्याक छ । डब्लूएलटीपीका अनुसार उक्त ब्याट्रीले फुल चार्जमा ४३० किलोमिटरसम्म रेन्ज दिनेछ । ११ किलोवाटको एसी चार्जरले १२ घण्टामा यसलाई फुलचार्ज गर्न सकिने छ ।
यसको लम्बाइ ५ हजार ५०० एमएम, चौडाइ १ हजार ९९७ एमएम, उचाइ १ हजार ८७४ एमएम छ । ३ हजार ३०० एमएम लामो ह्वीलबेस रहेको यस पीकअपमा २३० एमएम ग्राउण्ड क्लियरेन्स छ ।
फोर ह्वील ड्राइभ अप्सन भएको यस पीकअपको अगाडि १२५ र रियरमा २०० किलोवाटको मोटर दिइएको छ । दुवै मोटरको संयुक्त पावर ३१५ किलोवाट रहेको बताइएको छ ।
कम्पनीले नेपाली बजारमा यस पीकअपमा ५ वर्ष वा १ लाख ६० हजार किलोमिटर र हाइ भोल्टेज ब्याट्रीमा ८ वर्ष वा २ लाख किलोमिटरसम्मको वारेन्टी दिएको छ । २० आधुनिक सुरक्षा फिचरहरु, ९ एयरब्याग, ३६० डिग्री सराउण्डिङ क्यामेरा, अडाप्टिभ क्रुज कन्ट्रोल, लेन किप असिस्ट जस्ता फिचर्स भएको म्याक्सस ई–टेरोन ९ को सुरुवाती मूल्य कम्पनीले ९९ लाख ९९ हजार रुपैयाँ तोकेको छ ।
