नेपाली कांग्रेसका केन्द्रीय सदस्य एवं प्रतिनिधिसभा सदस्य विनोद चौधरीले उखुको समर्थन मूल्य तत्काल तोक्न र भाउ मूल्य बढाउन सरकारसँग माग गरेका छन् । सरकारले समयमै उखुको समर्थन मूल्य नतोक्दा किसान निराश बनेको भन्दै समर्थन मूल्य तोक्न र अघिल्लो वर्षभन्दा मूल्य बढाउन माग गरेका हुन् ।
सांसद चौधरीले उपप्रधान एवं अर्थमन्त्री विष्णु पौडेल र कृषिमन्त्री रामनाथ अधिकारीलाई भेटेर गत वर्ष सरकारले तोकेको अनुदानबापतको रकम उखु किसानले अहिलेसम्म पनि नपाएको र केही चिनी मिलले पनि किसानलाई अझै भुक्तानी नदिएको बताएका छन् ।
उखुको न्यूनतम मूल्य प्रतिक्विन्टल ७३५ रुपैयाँ र ढुवानी बापतको नेपाल सरकारले प्रदान गर्ने अनुदान रकम प्रतिक्विन्टल १०० रुपैयाँ गरी ८३५ रुपैयाँ कायम गर्न प्रस्ताव गरेका छन् ।
साथै सांसद चौधरीले नवलपरासी जिल्ला केरा तथा उखुको पकेट एरिया भएको हुँदा अन्य बाली भन्दा केरा तथा उखुलाई बढी मलको आवश्यकता पर्ने र हाल प्राप्त मलको कोटाले नपुग्ने भन्दै सो क्षेत्रका लागि मलको कोटा बढाउन पनि अनुरोध गरेका छन् ।
