नेपाल उद्योग वाणिज्य महासंघको कृषि उद्यम केन्द्र र नेपाल वीउ तथा मल परियोजनाको संयुक्त आयोजनामा सुदूरपश्चिम र लुम्बिनी प्रदेश स्तरीय गोष्ठी सम्पन्न भएको छ । साउन २३ गते धनगढीमा “कृषि व्यवसायमा आवद्ध लघु तथा मझौला उद्यमीहरुको अवस्था अवसर एंव चुनौती” विषयक प्रदेशस्तरीय गोष्ठी सम्पन्न भएको हो ।
गोष्ठीमा सुदूरपश्चिम प्रदेशका भूमि व्यवस्था, कृषि तथा सहकारीमन्त्री वीरबहादुर थापाले स्थानीय स्तरमा उत्पादित कृषि उत्पादनहरूको प्रवद्र्धन गर्न र उत्पादक कृषकका साथै लघु, साना तथा मझौला उद्यमीहरूलाई सहयोग गरी कृषि क्षेत्रको रूपान्तरण गर्न सरकार तयार रहेको बताएका छन् ।
महासंघको कृषि उद्यम केन्द्रका सभापति डिबी बस्नेतले कृषिमा आवद्ध व्यवसायीहरूको हक अधिकार सुनिश्चित गर्न र नेपाल भरि कृषिको व्यवसायीकरण र यसको प्रवर्दन गर्ने कार्यमा कृषि उद्यम केन्द्र निरन्तर रुपमा लागि रहेको बताएका छन् । स्थानीय उत्पादक र व्यवसायीहरूलाई बजारको अवस्था अनुकूल नभएसम्म आफ्नो सामान भण्डारण गर्न सातै प्रदेशमा उत्पादित वस्तु राख्न ठूला गोदामहरूको आवश्यकता रहेको सभापति बस्नेतको भनाइ छ ।
गोदाम निर्माण र सञ्चालनमा प्रदेश सरकारको ध्यान जानुपर्ने र व्यवसायीहरु मिलेर स्थापना गरिने कम्पनीमार्फत कृषिको व्यवसायीकरणको नमुना कार्य गर्न नेपाल उद्योग वाणिज्य महासंघलाई कम्तिमा ५० हेक्टर जमीन एकै ठाउँमा उपलब्ध गराइ दिन समेत सभापति बस्नेतले प्रदेश सरकारलाई अनुरोध गरे ।
कृषिमा आवद्ध उत्पादक, गल्ला व्यवसायी, मिल सञ्चालक, पशु फार्म सञ्चालक, दाना मिल जस्ता निजी व्यवसायीहरु तथा प्रदेश र स्थानीय स्तरका सरकारी एवं सामुदायिक सेवाप्रदायकहरु गरी ६५ जनाको सहभागिता रहेको गोष्ठीमा प्रदेश नीति तथा योजना आयोगका सदस्य प्राध्यापक डा. जगतबहादुर सिंह रावल, प्रदेश कृषि निर्देशनालयका निर्देशक खगेन्द्र शर्मा; उद्योग वाणिज्य महासंघ सुदुरपश्चिम प्रदेशका उपाध्यक्ष अनिल कुमार, प्रदेश सहकारी संघका माधव शर्मा र असल सिर्जना कृषि सहकारी लम्कीका कृष्णा घर्ती प्यानालिष्टको रूपमा सहभागी भई उद्यमीहरुको अवस्था, सम्भावना एवं चुनौतीका बारेमा धारणा राखेका थिए ।
कृषि व्यवसायमा आवद्ध उद्यमीलाई बढावा दिने, कृषि विकासलाई प्रोत्साहन गर्ने र स्थानीय उद्यमीहरूलाई व्यवसाय प्रवद्र्धनमा सहयोग गर्ने उद्देश्यले सञ्चालित कार्यक्रम सिम्याट परियोजनाको आर्थिक सहयोगमा सेप्टेम्बर २०२३ देखि नोभेम्बर २०२४ सम्म लुम्बिनी र सुदूरपश्चिम प्रदेशका ६ वटा तराई जिल्लामा हाल सञ्चालनमा रहेको छ ।
श्रावण २१ र २३ गते नेपालगञ्ज तथा धनगढीमा सम्पन्न प्रदेशस्तरीय गोष्ठीमा कृषि उद्यम केन्द्रका वोर्ड सदस्यहरु सुनिता न्हेमाफुकी, खोजराज कटुवाल, सिम्याट परियोजनाका डा. नारायण खनाल र सिचन श्रेष्ठ, सफल पार्टनर्सका आशुतोष तिवारी लगायतको सहभागिता थियो ।
