रामेछापका जुनार कृषकहरुले जंगली जनावरले दुःख दिएको गुनासो गरेका छन् । पाकेको जुनार बाँदर, मृग लगायतका जंगली जनावरहरुले नष्ट गरिदिएको किसानहरुले गुनासो गरेका हुन् ।
शुक्रबार जुनार जोन संचालन समन्वय समिति रामेछापको वडा नं. ७ सुकाजोरमा जुनार जोन संचालन समन्वय समितिका अध्यक्ष गुन्ज बहादुर कार्कीको अध्यक्षतामा भएको घुम्ती बैठकमा जुनार कृषक राम कुमार कार्कीले बाँदरले अरु बालिनालीसँगै जुनारमा पनि क्षति गर्न थालेको गुनासो गरेका छन् । जुनारको दाना झार्ने, टोक्ने जस्ता क्रियाकलाप गरेर बाँदरले धेरै दुःख दिएको उनको भनाइ छ ।
अर्का जुनार कृषक ज्ञान बहादुर तामाङ्गले पनि हावापानी सुहाउँदो जुनारको विरुवा नहुँदा बिरुवा मर्ने समस्या देखा परेको अरु ठाउँहरुबाट खरिद गरेको बिरुवा हुर्काउनै नसकेको गुनासो पोखे ।
जुनार कृषक इन्द्र तामाङ्गले यस वर्ष किसानले बगैँचामै प्रतिकिलो ५० देखी ७० रुपैयाँसम्म मूल्य पाएको भन्दै खुशी व्यक्त गरेका छन् ।
