हिमालयन लघुवित्त वित्तीय संस्थाले व्यवस्थापकहरुको नेतृत्व विकास गर्ने उद्धेष्यले Managerial Leadership Development Training कार्यक्रम आयोजना गरेको छ ।
तीन दिनसम्म आयोजित तालिममा कम्पनीका सम्पूर्ण शाखा प्रमुख, क्लस्टर प्रमुख र केन्द्रीय कार्यालयका कर्मचारीसहित करिब १०० जनाको सहभागिता थियो ।
सो अवसरमा कम्पनीका प्रमुख कार्यकारी अधिकृत विनोद आचार्यले संस्थाले हासिल गरेको प्रगति तथा नतिजा कर्मचारीहरुकै अथक मिहेनत, प्रयास र परिश्रमको फल भएको बताए ।
उनले विविध सूचकाङ्कको आधारमा विगत पाँच वर्षको वृद्धिदर हेर्दा कम्पनीले लघुवित्त बजारमा आफ्नो बलियो उपस्थिति जनाएको र यसको सम्पूर्ण श्रेय संस्थामा कार्यरत सम्पूर्ण कर्मचारीहरुमा जाने पनि बताए । साथै उनले आवश्यकताको पहिचान गरी कर्मचारीहरुलाई तालिमहरु प्रदान गर्दै जाने योजना रहेको बताए ।
कार्यक्रममा कम्पनीको सञ्चालक समितिका अध्यक्ष बिजय मान नकर्मी तथा अन्य सञ्चालकहरुले सिकेका सिपलाई व्यवहारमा उतार्न अनुरोध गर्दै सहभागीलाई प्रमाणपत्र वितरण गरेका थिए ।
कम्पनीले ७५ शाखा कार्यालयमार्फत ७५ हजारभन्दा बढी सदस्यहरुलाई लघुवित्तीय सेवाहरु प्रदान गर्दै करिब ९२ करोड रुपैयाँ बचत संकलन गरी करिब ४ अर्ब रुपैयाँ लगानी गरेको छ ।उक्त कम्पनी हिमालयन बैंक लिमिटेडको सहायक कम्पनी हो ।
