नेपाल राष्ट्र बैंकको रिक्त दुई कार्यकारी निर्देशकको पदमा हिम प्रसाद न्यौपाने र मुक्तिनाथ सापकोटाको बढुवा भएको छ। राष्ट्र बैंकको मानव संशाधन व्यवस्थापन विभागले क्रमश पहिलो र दोस्रो बरियताका निर्देशक रहेका उनीहरुलाई रिक्त कार्यकारी निर्देशक पदमा बढुवा गरिएको जनाएको छ।
राष्ट्र बैंकमा १८ जना कार्यकारी निर्देशक रहने व्यवस्था छ। केहि दिन अघि मात्र सरकारले कार्यकारी निर्देशक रहेका किरण पण्डितलाई डेपुटी गभर्नर नियुक्त गरेको थियो। यस संगै उनको कार्यकारी निर्देशक पद रिक्त भएको थियो। त्यस्तै उमेर हदको कारण कार्यकारी निर्देशक रोशन सिग्देलले अनिवार्य अवकाश पाएका थिए। सो संगै उनी रहेको कार्यकारी निर्देशक पद पनि रिक्त भएको थियो। यसरी दुई जनाको कार्यकारी निर्देशकको पद रिक्त भएको थियो। आज दुवै पदमा पदपूर्ति भएको हो ।
अहिले सरकारले एक जना डेपुटी गर्भनर मात्र नियुक्त गरेको छ । राष्ट्र बैंकमा अझै एक डेपुटी गभर्नरको पद रिक्त छ। सरकारले कार्यकारी निर्देशकहरु मध्येबाट थप एक जनालाई डेपुटी गभर्नर नियुक्त गर्ने छ। डेपुटी गभर्नरको लागि सबै कार्यकारी निर्देशक दाबेदार हुने भएकोले आज बढुवा भएका दुवै जना डेपुटी गभर्नरको दाबेदार पनि भएका छन् । सरकारले अर्को एक जना कार्यकारी निर्देशकलाई डेपुटी गभर्नर नियुक्त गरे पनि अर्को एक कार्यकारी निर्देशकको पद पनि रिक्त हुने छ।
यस अघि : राष्ट्र बैंकमा दुई जना कार्यकारी निर्देशक पद रिक्त, कसको हुन्छ बढुवा ?
