सिप्रदी ट्रेडिङ र सिप्रदियन सहायता संस्थाले काठमाडौँ उपत्यकाका १५ प्रमुख स्थानहरुमा यात्रु सहायता कक्ष स्थापना गरेका छन् । काठमाडौँ महानगर, महानगरीय ट्राफिक प्रहरी, नेपाल प्रहरी, यातायात व्यवस्था विभाग र नाडाको सहकार्यमा सिप्रदी ट्रेडिङ र सिप्रदियन सहायता संस्थाले यात्रु सहायता कक्षको व्यवस्था गरेका हुन् ।
दशैं मनाउन उपत्यका छोड्ने यात्रुहरुको संख्या बढ्ने हुनाले त्यसको सहजीकरणका लागि यात्रु सहायता कक्ष स्थापना गरिएको कम्पनीले जनाएको छ । सिप्रदीका अनुसार बल्खु, नयाँ बसपार्क, गौशाला, चापागाउँ, स्वयम्भू हल्चोक, चावहिल, जावलाखेल, वाफल, कलंकी, कोटेश्वर, माछापोखरी, सातदोबाटो, दक्षिणकाली, सुन्धारा, नागढुंगा, जडीबुटी र जगातीमा यात्रु सहायता कक्ष राखिएका छन् ।
यात्रुहरुलाई टिकट बुकिङका क्रममा समस्या आउन नदिन र अरु अन्योलता नपरोस् भनी यो सेवा दिइएको बताइएको छ । आवतजावतका क्रममा सर्वसाधारण यात्रुलाई सडक तथा सवारी सुरक्षा बारे जानकारी प्रदान गर्न यात्रु सहायता कक्षले मनिटरीङ गर्ने कम्पनीले जनाएको छ ।
