निजी क्षेत्रको हवाई सेवा प्रदायक बुद्ध एयरले आज बुधबारदेखि भारतको वाराणसीको लागि तेस्रो उडान थपेका छ । यसअघि साताको सोमबार र शुक्रबार मात्रै उडान हुने गरेकोमा अब सातामा तीन उडान हुनेछन् ।
साताको तीन उडानले यात्रुलाई आउजाउमा सहयोग पुग्ने बुद्ध एयरको विश्वास छ । बुध्द एयरको भगनी संस्था बुद्ध होलिडेजले वाराणसी, सारनाथ अयोध्यालगायत वरपरका विभिन्न गन्तव्यको होलिडे प्याकेज पनि ल्याएको छ ।
यात्रुलाई भारतको गया गई सोह्र श्राद्ध गर्न थप सहयोग पुग्नेछ । बुद्धका उडानबाट वाराणसी ५० मिनेटमै पुग्न सकिन्छ । काठमाडौंबाट वाराणसीको शुरुवाती एकतर्फी भाडादर ११ हजार ३६० रुपैयाँ रहेको छ ।
बुद्ध होलिडेजले आउने जाने भाडा, अयोध्या घुम्ने, दुईतारे होटलमा बस्नेसहितको २ रात ३ दिनको प्याकेज न्यूनतम ३५ हजारमा उपलब्ध गराउँदै आएको छ । यस्तो प्याकेज ३ रात ४ दिनको ४४ हजार रहेको बुद्ध एयरले जनाएको छ ।
बुद्धको वनारस उडानमा चाप बढ्दै गएको छ ।
बुद्धले २०६८ साल फागुनबाट काठमाडौँ–वनारसको उडान सुरु गरेको हो । यो गन्तव्यमा सुरुमा एटीआर ४७ नामक ४२ सिट क्षमताको जहाज पठाउने गरेको थियो । हाल यो गन्तव्यमा एटीआर ७२ नामक ७२ सिट क्षमताका जहाजबाट उडान हुँदै आएको छ ।
हाल बुद्धका १८ वटा जहाजले उडान गरिरहेका छन् । हाल १५ वटा एटीआरका ७२ सिट क्षमताका जहाज भएको यो वायुसेवासँग ३ वटा ४७ सिट क्षमताका एटीआर जहाज पनि छन् ।
सन् १९९६ बाट सेवा सुरु गरेको यो वायुसेवाले आन्तरिक उडानमा प्रमुख सहरी गन्तव्यमा उडान गरिरहेको छ । बुद्धले जनकपूरबाट अयोध्या उडानको तयारी पनि गरिरहेको छ । बुद्धले पोखराबाट दिल्ली सिँधा उडान गर्ने अनुमति समेत माग गरिरहेको छ ।
