एमजीका इलेक्ट्रिक गाडी खरिद गर्दा नेपाल इन्भेष्टमेण्ट मेगा बैंकले ८० प्रतिशतसम्म फाइनान्सिङ गर्ने भएको छ । नेपालका लागि एमजी मोटर्सको अधिकृत बिक्रेता पारामाउन्ट मोटर्स र इन्भेष्टमेण्ट मेगा बैंकबीच फाइनान्सिङ सम्बन्धि समझदारी भएसँगै एमजीका गाडी किन्दा इन्भेष्टमेण्ट मेगा बैंकबाट ८० प्रतिशतसम्म फाइनान्सिङ सुविधा प्राप्त हुने भएको हो ।
बैंक र पारामाउण्ट मोटर्सबीच भएको साझेदारीपश्चात एमजीका जेडएस ईभी, एमजी ४ ईभी र एमजी कमेट ईभी खरिद गर्ने ग्राहकले ८० प्रतिशतसम्म फाइनान्सिङ सुविधा पाउने छन् । यो सुविधा नेपाल इन्भेष्टमेण्ट मेगा बैंकका सबै शाखाबाट उपलब्ध हुनेछ ।
बैंकले प्रतिस्पर्धी ब्याज दरमा उपलब्ध गराउने भनेको यो सुविधा आधार दरमा १ प्रतिशत प्रिमियम प्रतिवर्ष जोडिएको हुनेछ । ग्राहकले कागजात पेश गरेर प्रक्रिया सुरु गरेको ३ कार्य दिनभित्र कर्जा स्वीकृत गरिने बताइएको छ ।
पारामाउण्ट मोटर्सले यस समझदारीलाई पर्यावरणमैत्री गाडीहरूको लागि सरल वित्तीय योजना भनेको छ । “एनआईएमबी बैंकसँगको साझेदारीले हाम्रा ग्राहकहरूका लागी एमजी इलेक्ट्रिक गाडीहरूलाई अझ पहुँच योग्य बनाउन महत्वपूर्ण कदम हो,” पारामाउण्ट मोटर्सका प्रवक्ताले भनेका छन् ।
