भोटेकोशीमा आएको भिषण बाढीमा करिब ३ सय यात्रुबाहक बस हराइरहेको पाइएको छ । यातायात व्यवसायी राष्ट्रिय महासंघका अनुसार जनैपूर्णिमाको अवसरमा गोसाईंकुण्ड दर्शनका लागि काठमाडौँबाट बस रिजर्भ गरेर गएका यात्रुहरु सम्पर्कबिहीन भएका हुन् ।
महासंघका अध्यक्ष अध्यक्ष सरोज सिटौलाका अनुसार ठुलो संख्यामा बस तथा यात्रुहरु सम्पर्कविहीन भएका हुन् ।
महासंघले यात्रुको अवस्था बुझ्न र उद्धारका लागि बुधबार करिब २५–३० जनाको टोली घटनास्थलतर्फ पठाए पनि बाटो अवरुद्ध भएका कारण टोली बिचबाटै फर्किन बाध्य भएको जनाएको छ ।
काठमाडौँ, चितवन, पोखरा, गोरखा लगायतका स्थानबाट गाडी रिजर्भ गरेर गोसाईंकुण्ड हिँडेका यात्रुहरु गाडीसहित बेपत्ता रहेको र अहिले उनीहरुको अवस्थाबारे बुझ्ने काम भइरहेको महासंघले जनाएको छ । महासंघ प्रारम्भिक तथ्यांक अनुसार बाढीका कारण करिब ३०० यात्रुवाहक बस हराइरहेका छन् ।
