कृषि, वन तथा पर्यावरणमन्त्री गीता चौधरीले यसवर्ष विगतका वर्षको तुलनामा सबैभन्दा बढी रासायनिक मल आयात भएको बताएकी छिन् । विगतको भन्दा धेरै मल आयात गरिएको हुनाले किसानलाई सहज रूपमा मल उपलब्ध गराउन सरकार निरन्तर लागिरहेको उनको भनाइ छ ।
चितवनको खैरहनीमा आयोजित कार्यक्रममा उनले यस वर्ष रोपाइँ गर्नुअघि मल उपलब्ध गराउने प्रयास गरिए पनि केही प्राविधिक तथा आपूर्ति व्यवस्थापनसम्बन्धी समस्याका कारण मल पु¥याउन नसकिएको बताइन् । उनका अनुसार साउन १ गतेदेखि नयाँ लटको आयात सुरु हुँदैछ । मल बन्दरगाहमा आइपुगेको छ ।
माग र आपूर्तिबीच अझै सन्तुलन कायम गर्न चुनौती रहेको उल्लेख गर्दै मन्त्री चौधरीले किसानलाई सहज सेवा प्रदान गर्न टोल फ्री नम्बर सञ्चालनमा ल्याइएको बताइन् ।
सरकारले चालु आर्थिक वर्षमा ५ लाख ५० हजार मेट्रिक टन रासायनिक मल देशभर पठाइसकेको भन्दै मन्त्री चौधरीले खेती प्रणाली विस्तारसँगै रासायनिक मलको माग तीव्र रूपमा बढेको र मागअनुसार आपूर्ति गर्न सरकार प्रतिवद्ध रहेको बताएकी छिन् ।
