झापा, विराटनगर, इटहरी लगायतका शहरहरु मुलुककै अर्थतन्त्रका लागि प्रमुख केन्द्र मानिन्छन् । छिमेकी देश भारतसँगको सहज पहुँच र औद्योगिक दृष्टिले समेत रणनीतिक महत्व राख्ने यो क्षेत्रमा अहिले झन विश्वस्तरीय आतिथ्य सेवासमेत थपिन थालेपछि पूर्वी नेपालको गरिमा अझ बढेको छ ।
यसै क्रममा अन्तर्राष्ट्रिय चेन होटल ग्रुप इन्टरकन्टिनेन्टल होटल ग्रुपको लक्जरी ब्राण्ड ‘होलिडे इन एक्सप्रेस एण्ड स्वीट्स’ले निकट भविष्यमै झापाबाट सेवा आरम्भ गर्दैछ । झापाको धुलाबारीस्थित होटल इस्टर्न नेपाल लिमिटेडले ‘होलिडे इन एक्सप्रेस एण्ड स्वीट्स’लाई नेपाल भित्र्याउन लागेको हो ।
‘प्राइम लोकेशन’ र विश्वस्तरीय सेवा
पाँचतारे यो होटल २ बिघा क्षेत्रफलमा फैलिएको छ । हाल निर्माणाधिन अवस्थामा रहेको यस होटलले पूर्व–पश्चिम राजमार्गलाई ठ्याक्कै छोएको छ । कुल ९८ वटा आधुनिक कोठाहरु रहने होटल झापाको बिर्तामोडबाट जम्मा १२ किलोमिटर र भद्रपूर विमानस्थलबाट जम्मा १३ किलोमिटर दूरीमा अवस्थित छ । ‘होलिडे इन एक्सप्रेस एण्ड स्वीट्स’ले नेपालको आतिथ्यता क्षेत्रमा विशिष्ट पहिचान स्थापित गर्नेमा होटलका लगानीकर्ताहरु विश्वस्त देखिन्छन् ।
अन्तर्राष्ट्रिय स्तरको सेवा प्रदान गर्ने भएकाले यो होटलले भारतीय पर्यटकसहित भारत आउने अन्य देशका पर्यटकसमेत आकर्षित गर्न सक्ने विश्वास लिइएको छ । अहिले भारतीय पर्यटकहरुको घुमफिर संस्कृति बढिरहेको र खर्च क्षमता पनि विस्तार भइरहेकाले होलिडे इन एक्सप्रेस एण्ड स्वीट्सले उनीहरुलार्ई आकर्षित गर्ने प्रोजेक्ट म्यानेजर शक्ति आचार्यको विश्वास छ । ‘होटलबाट भारतसँगको सीमाना जम्मा ६ किलोमिटर मात्रै टाढा छ’ उनी भन्छन्, ‘भारतको बागडोगरा एयरपोर्टबाट हाम्रो होटल जम्मा २८ किलोमिटर दूरीमा अवस्थित छ ।’
नेपालकै ठूलो क्यासिनोदेखि भव्य बैंक्वेटसम्म
पाँचतारे, त्यसमाथि अमेरिकी ब्राण्ड । इन्टरकन्टिनेन्टल होटल ग्रुपले हाल विश्वका विभिन्न शहरहरुमा ६ हजारभन्दा बढी होटलहरुको व्यवस्थापन सम्हालिरहेको छ । उसले होटल इस्टर्न नेपालका ‘रुम एप्रुभ’ पनि गरिसकेको छ । व्यवस्थापकबाट एप्रुभ भएसँगै अहिले रुमसहित अन्य भौतिक संरचनाको काम तीव्र गतिमा भइरहेको छ ।
यस होटलको मुख्य भवनको आडैमा अर्को चार तलाको भवन बनिरहेको छ । त्यसको ‘टप फ्लोर’मा स्वीमिङ पुल रहनेछ । होटलको मुख्य भवनको चौथो तलाबाट स्वीमिङ पुलमा ‘एक्सेस’ हुनेछ । त्यहीँ भवनमा हेल्थ क्लब पनि रहने छ । जसमा जीम, सोना, स्टिम, स्पा लगायतका सेवा रहने छन् ।
यस होटलको अर्को महत्वपूर्ण विशेषता भनेको ‘क्यासिनो’ पनि हो, जुन नेपालकै ठूलो हुनेछ । क्यासिनाको क्षेत्रफल मात्रै २५ हजार ५ सय वर्गफिट हुनेछ । होटलले बिख्यात क्यासिनो ब्राण्ड ल्याउनका लागि आवश्यक सम्झौता लगायतका प्रक्रिया पनि पूरा गरिसकेको छ । निकट भविष्यमै यसको पनि औपचारिक जानकारी सार्वजनिक हुनेछ ।
अर्को छुटाउनै नहुने संरचना भनेको यसको बैंक्वेट हो । जसको क्षेत्रफल नै ९ हजार ५ सय वर्गफिट हुनेछ । साथै, ‘रुफ टप’ र ‘लबी’मा सुविधासम्पन्न रेष्टुरेन्ट रहने छन् । झण्डै ३ दशकदेखि होटल तथा पर्यटन व्यवसायमा लागेर सफलता हासिल गरेका पात्रहरु यसमा साझेदार रहेकाले यस होटलले आधुनिक ‘ट्रेण्ड’ अनुसारको सेवा र सोही अनुसारको ‘बिजनेश मोडल’ अपनाउँदैछ ।
विदेशी लगानी, स्वदेशीलाई रोजगारी
यो होटलको लगानी ३५० करोड रुपैयाँ प्रक्षेपित छ । यसमध्ये १५० करोड रुपैयाँ संस्थापक लगानीकर्ताहरुको सेयर रहनेछ । यो होटलमा केही हिस्सा विदेशी लगानी पनि रहनेछ । सरकारबाट स्वीकृत भएर विदेशी लगानी भित्रिसकेको छ ।
यति मात्रै होइन, होटलले २५० जनालाई प्रत्यक्ष रोजगारी प्रदान गर्नेछ । यसबाट स्थानीय युवाहरु लाभान्वित त हुने छन् नै, साथै स्थानीय कृषि उत्पादनको समेत खपत बढ्नेछ । पर्यटकको आवागमन बढ्नासाथ त्यसले उपभोग र ‘मोबिलिटी’ बढाउने भएकाले यसबाट स्थानीय अर्थतन्त्र चलायमान हुँदै क्षेत्रीय अर्थतन्त्रको विकासमा समेत मनग्य टेवा पुग्ने विश्वास गरिएको छ ।
आउँदो आर्थिक वर्षभित्र आईपीओ
अहिले यो होटलको करिब ९२ प्रतिशत निर्माण सकिएको छ । अब चाँडै होटल आंशिक रुपमा सञ्चालनमा समेत आउनेछ । व्यवस्थापक इन्टरकन्टिनेन्टल होटल ग्रुपबाट रुम एप्रुभ भइसकेकाले अहिले सोही अनुसार बाँकी काम धमाधम भइरहेको छ । यो काम सकिएपछि असोजमा होटलको ‘सफ्ट ओपनिङ’ हुनेछ ।
तर, त्यसभन्दा अगाडि नै होटल आंशिक रुपमा सञ्चालनमा आइसक्ने छ । आंशिक सञ्चालन सुरु भएसँगै होटलले सर्वसाधारण लगानीकर्तामा सेयर निष्काशनको अनुमति माग गर्दै धितोपत्र बोर्ड (सेबोन)मा आवेदन दिनेछ । आर्थिक वर्ष २०८३/०८४ को पहिलो महिना साउनमै धितोपत्र बोर्डमा आवेदन दिने र आर्थिक वर्ष २०८३/०८४ भित्रै आईपीओ निष्काशन गर्ने कम्पनीको लक्ष्य छ ।
