झण्डै २ महिनादेखि रोकिएको नेपाली चियाको निर्यात पुनः सुरु भएको छ । भारतीय चिया बोर्डले गुणस्तर परीक्षणको नाममा रोकेको निकासी फेरी सुरु भएको हो ।
कूटनीतिक पहल र भारतीय खाद्य सुरक्षा तथा मापदण्ड प्राधिकरणले परीक्षण प्रणालीमा खुकुलो मापदण्ड लागु गरेसँगै काँकडभिट्टा हुँदै चियाका गाडीहरू भारततर्फ जान थालेका हुन् ।
२ महिनासम्म निकासी प्रभावित हुँदा इलामका चिया उद्योगहरूमा मात्रै करिब १२ लाख किलो अर्थोडक्स चिया थन्किएको थियो । नेपाल चिया उत्पादक संघका अनुसार सोमबार चिया बोकेका २ वटा ट्रक नेपालको काँकडभिट्टा हुँदै भारतको पानीट्यांकी भन्सार पार गरेका छन् ।
यसअघि बैशाख १८ गतेदेखि भारतले नेपालबाट जाने प्रत्येक गाडीमा लोड भएको चियाको अनिवार्य नमुना परीक्षण गर्नुपर्ने नियम लगाएको थियो । उक्त झन्झटिलो नियमका कारण निकासी ठप्प हुँदा ८६ वटा चिया उद्योग पूर्णरूपमा बन्द हुने अवस्थामा पुगेका थिए ।
