नेपाल उद्योग वाणिज्य महासंघको वरिष्ठ उपाध्यक्ष र कोषाध्यक्षको चयन आगामी शुक्रबार हुने भएको छ । महासंघको वरिष्ठ उपाध्यक्ष र कोषाध्यक्षको निर्वाचन एकैदिन गर्न लागिएको हो । त्यसअघि शुक्रबार बिहान ९ बजे केन्द्रीय कार्यसमितिको बैठक बोलाइएको छ ।
वरिष्ठ उपाध्यक्ष र कोषाध्यक्षका आकांक्षीहरुलाई मनोनय दर्ताको समय पनि सोही दिनलाई तोकिएको छ ।
यी हुन् वरिष्ठ उपाध्यक्षका ५ दाबेदार
महासंघको वरिष्ठ उपाध्यक्षका लागि ५ जना आकांक्षी देखिएका छन् । २ जना निवर्तमान उपाध्यक्ष, २ जना पूर्व उपाध्यक्ष र एक जना निवर्तमान कोषाध्यक्षले वरिष्ठ उपाध्यक्षमा दाबी प्रस्तुत गरिसकेका छन् ।
निवर्तमान उपाध्यक्ष द्वय सुरकृष्ण वैद्य र हेमराज ढकालसहित पूर्व उपाध्यक्षहरु रामचन्द्र सांघाई र किशोर प्रधानले पनि वरिष्ठ उपाध्यक्षमा दाबेदारी प्रस्तुत गरेका छन् । यीमध्ये ढकालले साधारणसभा अगाडि नै उम्मेदवारी घोषणा गरेका थिए ।
यस्तै, निवर्तमान कोषाध्यक्ष भरतराज आचार्यले पनि वरिष्ठ उपाध्यक्षमा आकांक्षा देखाएका छन् । महासंघको विधान अनुसार एक कार्यकाल पदाधिकारी भइसकेको वा ३ कार्यकाल सदस्य भइसकेको बहालवाला केन्द्रीय कार्यकारिणी समिति सदस्य वरिष्ठ उपाध्यक्षको उम्मेदवार बन्न योग्य मानिन्छ ।
कोषाध्यक्षमा ३ जना आकांक्षी
यस्तै, कोषाध्यक्षको निर्वाचन पनि सोही दिन हुने भएको छ । उक्त पदमा हालसम्म ३ जना दाबेदार देखिएका छन् । केन्द्रीय कार्यकारिणी समिति सदस्य अम्बिका प्रसाद पौडेल र भक्त हमालसहित पूर्व केन्द्रीय सदस्य मनिषलाल प्रधानले कोषाध्यक्षमा आकांक्षा देखाएका छन् ।
महासंघको विधान अनुसार कम्तीमा दुइ कार्यकाल सदस्य भइसकेको बहालवाला सदस्य मात्रै कोषाध्यक्ष पदका लागि उम्मेदवार हुन पाउने प्रावधान छ । यस आधारमा मनिषलाल प्रधानलाई कोषाध्यक्षको उम्मेदवार हुनका लागि पहिला मनोनित भएर केन्द्रीय सदस्य हुनुपर्ने छ ।
अध्यक्षले ७ जनालाई मनोनित गर्दै
महासंघका अध्यक्ष अन्जन श्रेष्ठले विधानले दिएको अधिकार प्रयोग गर्दै ७ जनालाई केन्द्रीय कार्यकारिणी समिति सदस्यमा मनोनित गर्नेछन् । ८ गते बिहान ९ बजे बस्ने केन्द्रीय समिति बैठकबाट अध्यक्ष श्रेष्ठले ७ जनालाई मनोनित गर्ने र सोही दिन उनीहरुलाई सपथ ग्रहणसमेत गराउने भएका छन् ।
त्यसपछि सोही दिन वरिष्ठ उपाध्यक्ष र कोषाध्यक्षको चुनाव हुनेछ । यसपाली अध्यक्ष श्रेष्ठले मनोनित सदस्यहरुलाई पनि वरिष्ठ उपाध्यक्ष र कोषाध्यक्षको निर्वाचनमा मतदान अधिकार हुने गरी नियमावली संशोधन गराउन लागेका छन् । नियमावली संशोधनका लागि उपाध्यक्ष कृष्ण प्रसाद शर्माको नेतृत्वमा ५ सदस्यीय समिति बनाइएको थियो । उक्त समितिले मनोनित सदस्यहरुलाई पनि वरिष्ठ उपाध्यक्ष र कोषाध्यक्ष चयन प्रक्रियामा सहभागी गराउने गरी नियमावली संशोधन गर्न सिफारिस गरिसकेको छ ।
