सरकारले उर्जा क्षेत्रको विकासको लागि लागि विभिन्न कार्यक्रम अघि सारेको छ । राष्ट्रपति रामचन्द्र पौडेलले आज आर्थिक वर्ष २०८३/८४ को नीति तथा कार्यक्रम सार्वजनिक गर्दै उर्जा क्षेत्रको विकासको लागि ८ बुँदे योजना अघि सारेका हुन् ।
जसमा ऊर्जा, वन, भूमि तथा वातावरणसम्बन्धी कानून परिमार्जन गरी एकद्वार प्रणाली लागु गर्ने, विद्युत उत्पादन, प्रसारण, वितरण र व्यापारमा निजी क्षेत्रको सहभागिता सुनिश्चित गरिने लगायतका रहेका छन् ।
यस्ता छन् नीति तथा कार्यक्रममा समावेश उर्जा क्षेत्रका विषय
१. आगामी दशकमा तिस हजार मेगावाट विद्यु उत्पादन लक्ष्य हासिल गर्न ऊर्जा, वन, भूमि तथा वातावरणसम्बन्धी कानून परिमार्जन गरी एकद्वार प्रणाली लागु गरिनेछ।
२. आयोजना प्रभावित क्षेत्रका नागरिकलाई मुआब्जाको सट्टा शेयर लगानीको विकल्प प्रदान गरिनेछ ।
३. विद्युत उत्पादन, प्रसारण, वितरण र व्यापारमा निजी क्षेत्रको सहभागिता सुनिश्चित गरिनेछ ।
४. ऊर्जा- आधारित उद्योग प्रवर्धन गर्दै आन्तरिक खपतमा व्यापक वृद्धि गरिनेछ।
५. अन्तर देशीय ऊर्जा व्यापार सम्झौताहरूलाई दीर्घकालीन लगानी आकर्षित गर्ने माध्यम बनाइनेछ।
६. राष्ट्रिय ग्रिड नपुगेका स्थानमा अफग्रिड सौर्य,वायु तथा लघु जलविद्युत् प्रणाली विस्तार गरिनेछ ।
७. ग्रिन हाइड्रोजन, हरित अमोनिया तथा रासायनिक मल जस्ता रणनीतिक हरित उद्योगलाई प्रवर्धनका लागि कर-भन्सार छुट, सहुलियतपूर्ण विद्युत् दर, पुँजी प्रोत्साहन र लगानीमैत्री नीति लागु गरिनेछ ।
८. यातायात क्षेत्रमा व्यावसायिक प्रयोग विस्तार गर्न ग्रिन हाइड्रोजन पूर्वाधारको सुरुवात गरिनेछ ।
