नेपाल उद्योग वाणिज्य महासंघको आसन्न निर्वाचनमा उद्योगी प्रबलजंग पाण्डेले उपाध्यक्षमा उम्मेदवारी दिने भएका छन् । चैत २८–२९ मा हुने महासंघको साधारणसभा तथा निर्वाचनमा उद्योगी पाण्डेले एसोसियट उपाध्यक्षमा उम्मेदवारी दिने भएका हुन् ।
३ कार्यकाल महासंघको केन्द्रीय कार्यकारिणी समिति सदस्य भइसकेका उनी लोमस ग्रुपका सञ्चालक हुन् । औषधी, सिमेन्ट, बैंक तथा वित्तीय संस्था र बीमा कम्पनीमा उनी लगानीकर्ताका रुपमा आवद्ध छन् । उनी अहिले सिटिजन्स बैंकको अध्यक्ष छन् ।
पाण्डे महासंघका पूर्व अध्यक्ष प्रदीपजंगका छोरा हुन् । करिब १ दशकदेखि महासंघको आन्तरिक समिकरणमा सक्रिय रहेका उनी काबिल र व्यवस्थापकीय जिम्मेवारी कुशलतापूर्वक पूरा गर्ने व्यक्तित्वका रुपमा चिनिन्छन् ।
औद्योगिक र व्यवसायिक क्षेत्रको वृहत्तर उन्नयन र ति क्षेत्रले भोगिरहेका समस्याहरु समाधानमा सरकारलाई ‘स्ट्रङ लबिङ’ गर्नका लागि आफूले एसोसियट उपाध्यक्षमा उम्मेदवारी दिन लागेको पाण्डेले बताएका छन् । उनले अब नेपालमा ‘दोस्रो चरणको आर्थिक सुधार’ आवश्यक रहेको भन्दै यस विषय नीति निर्माताहरुलाई बुझाउन आवश्यक रहेको बताएका छन् ।
उनले एसोसियटतर्फ काबिल र ऊर्जाशील व्यवसायीहरुको टिम तयार गरिसकेका छन् ।
