शिखर पावर डेभलपमेन्ट लिमिटेडले निष्काशन गरेको आईपीओमा आवेदन दिने आज फागुन २६ गते मंगलबार अन्तिम दिन रहेको छ । कम्पनीले फागुन १७ गतेदेखि आम सर्वसाधारणलाई आईपीओ बिक्री खुला गरेको हो।
आईपीओ कम्तिमा ४ कार्य दिन खुला राख्नुपर्ने व्यवस्था छ । तर फागुन २० गतेदेखि २२ गतेसम्म चुनावको सार्वजनिक विदा परेको र फागुन २४ गते अन्तराष्ट्रिय महिला श्रमिक दिवसको सार्वजनिक विदा परेको थियो । सोहि कारण यो आईपीओमा आवेदन दिने म्याद थप गरेर आज फागुन २६ गतेसम्म कायम गरिएको हो।
कम्पनीले सर्वसाधारणलाई १८ लाख ४२ हजार ६ सय कित्ता (कर्मचारीलाई छुट्याईएको ४४ हजार ४ सय कित्ता बाहेक) शेयर निष्काशन गरेको छ। आवेदन दिंदा न्युनतम १० कित्ता र अधिकतम १० हजार कित्ताको लागि आवेदन दिन सकिने छ। शेयर निष्काशनको लागि ग्लोबल आईएमई क्यापिटल बिक्री प्रबन्धक रहेको छ।
कम्पनीले यस अघि नै आयोजना प्रभावित स्थानीय र वैदेशिक रोजगारीमा रहेका नेपालीलाई शेयर निष्काशन गरि बाँडफाँड गरिसकेको छ । नेपाल धितोपत्र बोर्डले पुस १६ गते गते कम्पनीलाई आईपीओ निष्काशनको अनुमति दिएको हो ।
यस कम्पनीले बाग्लुंगमा ४.९६ मेगावाट क्षमताको भिम खोला जलविद्युत आयोजना निर्माण सम्पन्न गरि २०८१ फागुन २५ देखि विद्युत उत्पादन गरिरहेको छ। साथै सोहि खोलामा ६.०५ मेगावाट क्षमताको तल्लो भिम खोला आयोजना निर्माण गरिरहेको छ।
यस कम्पनी अध्यक्ष नारायण प्रसाद उपाध्याय हुन् भने अन्य संचालकमा हेमराज आचार्य, सरोज दाहाल, नम्रता केसी र अभय पाण्डे रहेका छन् ।
