आइतबार महाशिवरात्रि पर्व । पशुपतिनाथ मन्दिरमा भक्तजनको घुइँचो हुने भएपछि सवारी साधनको रुट निर्धारणसहित ट्राफिक व्यवस्थापन योजना सार्वजनिक गरिएको छ ।
काठमाडौ उपत्यका ट्राफिक प्रहरी कार्यालयका अनुसार पार्किङका लागि निश्चित ठाउँ तोकिएको छ भने गाडी चल्ने रुट पनि तोकिएको छ ।
चाबहिल, गौशाला, तिलगंगा क्षेत्रमा सवारी आवागमनमा समस्या भए वैकल्पिक मार्गबाट सवारी साधन सञ्चालनको व्यवस्था मिलाइएको छ । गौशालामा भिडभाड धेरै भई सवारी चल्न नसक्ने अवस्था भएमा चाबहिलबाट गौशालातर्फ, पुरानो बानेश्वरबाट गौशाला तर्फ, ज्ञानेश्वर मैतिदेवीको मोडबाट रातोपुल हुँदै गौशालातर्फ, सिफल चौरबाट जय बागेश्वरीतर्फको रुटमा चल्ने सवारीलाई वैकल्पिक मार्ग प्रयोग गर्ने व्यवस्था मिलाइने योजना छ ।
तिनकुनेबाट सिनामङ्गलतर्फ, बौद्धबाट गौरीघाटतर्फ, पुरानो बानेश्वर, गौशाला र मित्रपार्क तर्फ आउने सम्पूर्ण मालबाहक सवारी साधनहरुलाई आवश्यकता अनुसार निषेध गरिएको छ ।
बागमती करिडोर र जोरपाटीबाट चाबहिल हुँदै चल्ने सवारी साधनलाई गुहेश्वरी पारी पार्किङ स्थान तोकिएको छ ।
पार्किङको व्यवस्था
१) सिफल चौरमा दर्शानार्थीहरुको सवारी, पास वाहक सवारी साधनहरु, सुरक्षाकर्मीका सवारी साधनहरु ।
२) गुहेश्वरी पारी तिर्थयात्री, दर्शानार्थीहरुको सवारी साधनहरु ।
३) पशुपति क्षेत्र विकास कोषको कार्यालय र भण्डारखालमा सवारी पासवाहक सवारी साधनहरु ।
४) तिलगंगा आँखा अस्पताल र करिडोरमा तिर्थयात्री, दर्शानार्थी र पर्यटकका सवारी साधनहरु ।
५) वनकाली क्षेत्रमा शिविर संचालन गर्ने संघ संस्थाहरु, दमकल, एम्बुलेन्स, खानेपानी र सुरक्षाकर्मीका सवारी साधनहरु ।
६) प्रहरी वृत्त गौशालामा पासवाहक सवारी साधन र सरकारी सवारी साधनहरु ।
