नेपाल उद्योग वाणिज्य महासंघले अबदेखि प्रत्यक्ष निर्वाचन प्रक्रियामार्फत अध्यक्ष चयन गर्ने भएको छ । महासंघको कार्यसमिति बैठकले विधान संशोधन गर्दै प्रत्यक्ष निर्वाचनबाट अध्यक्ष चयन गर्ने प्रावधान थप गरेको हो ।
महासंघको हालको विधानमा महासंघका वरिष्ठ उपाध्यक्ष आगामी कार्यकालमा स्वतः अध्यक्ष हुने प्रावधान थियो । अब यो प्रावधान संशोधन भएसँगै महासंघको अध्यक्ष प्रत्यक्ष निर्वाचनबाट चयन हुने भएको छ ।
कार्यसमितिले संशोधन गरेको विधानलाई आगामी मंसिरमा हुने विशेष साधारणसभाले पारित गरेपछि कार्यान्वयनमा आउने छ । यसअघि भवानी राणा वरिष्ठ उपाध्यक्ष हुँदा विधान संशोधन गर्दै स्वतः अध्यक्ष हुने व्यवस्था गरिएको थियो । त्यस भन्दा अगाडी प्रत्यक्ष निर्वाचनबाटै अध्यक्ष चयन हुने व्यवस्था थियो ।
महासंघका अध्यक्ष चन्द्रप्रसाद ढकालका अनुसार संशोधित प्रावधान हालका वरिष्ठ उपाध्यक्ष (अन्जन श्र्ष्ठ) स्वतः अध्यक्ष भएपछि अर्को कार्यकालबाट लागू हुनेछ ।
संशोधित विधानमा वरिष्ठ उपाध्यक्षको संख्या २ जना बनाइएको छ । हाल वस्तुगत, जिल्ला नगर र एसोसियट गरि तीन जना उपाध्यक्ष रहने प्रावधान रहेकोमा अब एक महिला उपाध्यक्षको पनि व्यवस्था गरिएको छ ।
