दीपक थपलिया
नेपाल अटोमोबाइल इम्पोर्टर्स एन्ड म्यानुफ्याक्चर्स एसोसिएसन (NAIMA)ले आयोजना गरेको ‘नाइमा मोबिलिटी एक्स्पो २०२५’ सफलतापूर्वक सम्पन्न भएको छ । उद्घाटनदेखि समापनसम्म आइपुग्दा एक्स्पो व्यवस्थित र भव्य भयो ।
स्टलहरू सफा थिए, आगन्तुकहरु हिँड्ने बाटो सफा र फराकिला (२० फिट) थिए र सम्पूर्ण कार्यक्रमको स्तर राम्रो थियो । आगन्तुकहरू सजिलै घुम्न सक्थे र हरेक स्टललाई आफ्ना प्रोडक्ट देखाउन पर्याप्त स्थान थियो । व्यवस्थापन र वातावरण राम्रो बनाएकोमा आयोजकको प्रशंसा गर्नै पर्छ ।
तर, विगत वर्षहरुमा भएका शो भन्दा युवर्ष नाइमाले आयोजना गरेको एक्स्पोको सबैभन्दा ठूलो फरक भनेको आउने आगन्तुकको स्तर थियो । अघिल्ला वर्षको तुलनामा उत्पादनको विविधता अलिक कम थियो, तर आउने मानिसहरू साँच्चिकै अटो प्रेमी थिए । उनीहरू केवल हिँड्न वा हेर्न मात्र आएका थिएनन्, उनीहरू बुझ्न, सोध्न र छलफल गर्न आएका थिए । उनीहरूलाई गाडी, बाइक र प्रविधिप्रतिको वास्तविक चासो थियो । यसकारण, हरेक प्रदर्शकले आफ्ना उत्पादनहरू यस्ता आगन्तुकलाई देखाउने मौका पाए, जसले त्यसको मूल्य बुझ्थे । यो गुणस्तरीय दर्शकको उपस्थिति नै यस एक्स्पोको विशेष सफलता बन्यो ।
अर्को राम्रो पक्ष भनेको हलभित्रको वातावरण हो । सामान्यतया हुने भीडभाड र हतारबिना आगन्तुक र प्रदर्शकबीच लामो समय कुराकानी हुने वातावरण बनेको थियो । मानिसहरूले आरामसँग सबै ब्राण्डका विशेषताहरू बुझ्न, मोडेलहरू तुलना गर्न र प्राविधिक पक्षहरू बुझ्न समय पाए । यो केवल व्यापारिक प्रदर्शनी मात्र नभई ज्ञान आदान–प्रदानको मञ्च जस्तो लाग्यो, जसले यस्ता कार्यक्रमको दीर्घकालीन मूल्य दिइरहन्छ । र, अबको हाम्रो अटोमोबाइल्स इन्डष्ट्रीले ज्ञान आदान–प्रदानलाई पनि उत्तिकै केन्द्रमा राख्नुपर्छ । जुन, यस एक्स्पोबाट सुरुवात पनि भएको छ ।
यस कार्यक्रमले नेपालको अटो बजारको परिपक्वता पनि देखाएको छ । केवल आकर्षक मोडल तथा ब्राण्डको लन्च वा चम्किला स्टलहरूमा मात्र नभई, ब्रान्डहरूले स्पष्ट जानकारी, पारदर्शी मूल्य र ग्राहकका वास्तविक प्रश्नहरूको जवाफ दिनमा ध्यान दिएका थिए । यसले देखाउँछ की, उद्योग र ग्राहक दुवै सँगसँगै परिपक्व हुँदैछन् ।
अब छिट्टै आउँदै गरेको NADA अटो शोको पनि सफल होस् भन्ने शुभकामना छ । यो प्रतिस्पर्धाको कुरा होइन, एक–अर्काबाट सिक्ने अवसर होस् । ताकि दुबै कार्यक्रम अझ राम्रो बनून् र अन्ततः लाभ आयोजक वा ब्रान्डलाई मात्र नभई ग्राहकलाई होस् । किनकि जब यो उद्योग सँगसँगै अघि बढ्छ, सबैको जित हुन्छ ।
(लेखक दीपक थपलिया लक्ष्मी हुण्डाईका महाप्रबन्धक हुन्)
