हायर पर्चेज कम्पनीहरुले पनि अटो लोनमा ऋण मूल्य अनुपात (लोन टू भ्यालू रेसियो) ६० प्रतिशत कायम गर्नुपर्ने भएको छ । राष्ट्र बैंकले यसअघि मौद्रिक नीतिको समीक्षामार्फत बैंक तथा वित्तीय संस्थाले विद्युतीय सवारी साधन र निजी प्रयोजनका व्यक्तिगत अन्य सवारी साधनमा कर्जा प्रवाह गर्दा ६० प्रतिशत मात्रै फाइनान्सिङ गर्नुपर्ने व्यवस्था गरेकोमा अहिले हायर पर्चेज सेवा दिने कम्पनीहरुलाई पनि यो व्यवस्था गरेको हो ।
राष्ट्र बैंकले हायर पर्चेज कर्जा दिने कम्पनीलाई स्वीकृति दिने नीतिगत एवम् प्रक्रियागत व्यवस्था, २०७० को पाँचौ संशोधन गर्दै सवारी साधनको ऋण मूल्यको अनुपात अधिकतम ६० प्रतिशतसम्म मात्र कायम गर्नुपर्ने बाध्यकारी व्यवस्था गरेको हो ।
‘कम्पनीले कर्जा प्रवाह गर्दा धितोको मूल्यको अधिकतम ८० प्रतिशतसम्म मात्र कर्जा प्रवाह गर्नु पर्नेछ । तर सवारी साधन खरिद गर्न कर्जा प्रवाह गर्दा देहायबमोजिमको सवारी साधनका लागि सवारी साधनको ऋण मूल्यको अनुपात अधिकतम ६० प्रतिशतसम्म मात्र कायम गर्नुपर्नेछ’ राष्ट्र बैंकले भनेको छ, ‘(क) सबै प्रयोजनका विद्युतीय सवारी साधन र (ख) निजी प्रयोजनका व्यक्तिगत अन्य सवारी साधन ।’
यसअघि ईभीमा ८० प्रतिशतसम्म फाइनान्सिङ हुँदै आएकोमा केन्द्रीय बैंकले मौद्रिक नीतिको समीक्षामार्फत बैंक तथा वित्तीय संस्थाले ६० प्रतिशतसम्म मात्रै फाइनान्सिङ गर्न पाउने व्यवस्था गरिदिएको थियो । अहिले हायर पर्चेज कम्पनीहरुलाई पनि यो प्रावधान लागू गरिदिएको छ ।
