नेपाली बजारमा आक्रामक रुपमा उदाएको टेलिकम कम्पनी ‘एनसेल’को ओरालो यात्रा सुरु भएको छ । हरेक महिना ‘सिम सब्सक्रिप्सन’का ग्राहक घट्न थालेसँगै नेपाली बजारमा एनसेलले उपस्थिति कमजोर बन्न थालेको देखिएको हो ।
नेपाल दूरसञ्चार प्राधिकरणका अनुसार पनि पछिल्लो समय एनसेलका ग्राहक घट्ने क्रम बढिरहेको छ । दूरसञ्चार प्राधिकरणको रिपोर्टअनुसार २०८१ मंसिरको तुलनामा २०८१ पौष महिनामा एनसेलका २ लाख भन्दा बढी ग्राहक घटेका छन् ।
‘सिम सब्सक्रिप्सन’का ग्राहक संख्या मंसिरसम्ममा १ करोड ४९ लाख ४४ हजार ९२७ थिए भने पौषसम्ममा यो संख्या २ लाख ७ हजार ७२२ ले घटेर १ करोड ४७ लाख ३७ हजार २०५ मा सिमित भएको छ ।
एनसेलको ग्राहक घटिरहेका बेला नेपाल दूरसञ्चार कम्पनी (नेपाल टेलिकम)को भने ग्राहक संख्या बढ्न थालेका छन् । मंसिरमा टेलिकमका ग्राहक १ करोड ५२ लाख १३ हजार ८५० थिए भने पौषसम्ममा १ करोड ५२ लाख १६ हजार ४५० पुगेका छन् ।
नेपाल टेलिकमलाई बजार हिस्सामा पछ्याइरहेको एनसेलले टेलिकमका ग्राहक बढ्ने र आफ्नो ग्राहक घट्ने क्रम सुरु हुन थालेपछि बजार हिस्सा पनि गुमाउन थालेको छ । २०८१ मंसिरसम्म एनसेलको बजार हिस्सा ४९.५५२ प्रतिशत थियो भने नेपाल टेलिकमको बजार हिस्सा ५०.४४४ प्रतिशत थियो । तर, पौषसम्ममा आउँदा एनसेलको बजार हिस्सा ४९.१९८ प्रतिशतमा झरेको छ भने नेपाल टेलिकमको बजार हिस्सा बढेर ५०.७९८ प्रतिशत पुगेको दूरसञ्चार प्राधिकरणको तथ्याङ्कमा उल्लेख छ ।
किन घट्न थाले एनसेलका ग्राहक ?
विगतमा आयकर छली प्रकरणले नेपाली प्रयोगकर्ता एनसेलप्रति नकारात्मक बनेका थिए । यो प्रकरण सेलाउन नपाउँदै एनसेलको माउ कम्पनी बिक्रीका क्रममा नेपालको कानुन उलङ्घन गरिएको र यसमा पनि कर छली भएको विषय बाहिर आयो । छानबिन समिति नै बन्यो । यसबाट पनि एनसेलका ग्राहक भड्किएको स्रोत बताउँछ ।
यसपछि पुनः एनसेलले ‘रिचार्ज भ्यालिडिटी’ घटाउने नीति लियो । एनसेलले ५० रुपैयाँदेखि ९९ रुपैयाँ सम्मको रिचार्जमा ७ दिन, ५ सय रुपैयाँदेखि ९९९ रुपैयाँ सम्मको रिचार्जमा ५० दिन र १ हजार माथिको रिचार्जमा ९० दिन मात्रै ‘भ्यालिडिटी’ दिन थालेपछि ग्राहकहरुले चर्को आलोचना गरेका थिए । कतिपयले एनसेल बहिष्कारको अभियान नै चलाएका पनि थिए । यसले पनि एनसेलको ग्राहक संख्या घटाएको बताइन्छ ।
यद्यपी, चर्को आलोचना खेप्न नसकेपछि एनसेलले अहिले ‘रिचार्ज भ्यालिडिटी’ घटाउने नीति सच्याएर नेपाल टेलिकम सरह नै बनाएको छ । आलोचना पछि एनसेलले ५० रुपैयाँदेखि ९९.९९ रुपैयाँ सम्मको रिचार्जमा ३० दिन, १ सय रुपैयाँदेखि १९९.९९ रुपैयाँ सम्मको रिचार्जमा ६० दिन, २ सय रुपैयाँदेखि २९९.९९ रुपैयाँ सम्मको रिचार्जमा १४० दिन, ३ सय रुपैयाँदेखि ४९९.९९ रुपैयाँ सम्मको रिचार्जमा २ सय दिन, ५ सय रुपैयाँदेखि ९९९.९९ रुपैयाँसम्मको रिचार्जमा ३६० दिन र १ हजार रुपैयाँ वा सोभन्दा माथिको रिचार्जमा ७३० दिनको ‘मान्य अवधि’ कायम गरेको छ ।
ग्राहक संख्या घटेको कारणबारे कम्पनीले केही अध्ययन गरेको छ कि भन्ने विषयमा जिज्ञासा राख्न एनसेलका अधिकारीहरुलाई सम्पर्क गर्दा कोही पनि सम्पर्कमा आउन चाहेनन् ।
