अगस्ट २१ देखि २३ तारिखसम्म भारतको नयाँ दिल्लीमा आयोजना हुने ‘फुटवेयर इन्डिया एक्स्पो–२०२६’मा नेपाली ब्रान्ड ‘जेम्स’ले सहभागिता जनाउने भएको छ ।
जेम्स ब्रान्डको उत्पादक कम्पनी नेपाल जुत्ता फ्याक्ट्री प्रालिले एक्स्पोमा आफ्नो स्टल राख्ने भएको हो । कम्पनीका प्रमुख कार्यकारी अधिकृत (सीईओ) विकास अर्यालका अनुसार लामो समयदेखि उक्त एक्स्पोमा नेपालको सहभागिता हुन सकेको थिएन । यसपटक भने नेपाल जुत्ता फ्याक्ट्रीले सहभागिता जनाउन लागेको उनले बताए ।
कम्पनीले विगत २५ वर्षदेखि विभिन्न प्रकारका गुणस्तरीय जुत्ता उत्पादन गर्दै आएको छ । जुत्ता तथा चप्पल उत्पादनमा आवश्यक पर्ने कम्पाउन्डसमेत उत्पादन गरी कम्पनीले अन्य उद्योग तथा व्यवसायलाई बिक्री गर्दै आएको छ ।
सीईओ अर्यालका अनुसार एक्स्पोमा भारतका करिब ४ सय जुत्ता उद्योग तथा व्यवसायको सहभागिता रहनेछ । अन्तर्राष्ट्रियस्तरको उक्त प्रदर्शनीमा नेपाली कम्पनीको सहभागिताले नेपालको फुटवेयर उद्योग तथा उत्पादनलाई भारतीय बजारमा चिनाउने र नयाँ बजार विस्तारका लागि अवसर सिर्जना गर्ने उनले बताए ।
नेपाल जुत्ता फ्याक्ट्रीको सहभागिताले नेपाली जुत्ताको गुणस्तर, उत्पादन क्षमता र ब्रान्डलाई अन्तर्राष्ट्रिय बजारमा प्रस्तुत गर्ने अवसर मिल्ने कम्पनीको अपेक्षा छ ।
