अहिले देशभरी नै खाना पकाउने ग्यास सहजै नपाउने समस्या उपभोक्ताले झेलिरहेका छन् । आयल निगममार्फत प्रत्यक्ष ग्यास बिक्री गर्दा पनि अवस्था सामान्य नभएपछि सरकारले पनि प्रत्यक्ष ग्यास बिक्री गर्न छोडेको छ ।
तर, साल्ट ट्रेडिङ कर्पोरेशनले भने उपभोक्तालाई व्यवस्थित रुपमा ग्यास बिक्री वितरणको प्रबन्ध मिलाएको छ । साल्ट ट्रेडिङका अनुसार कालिमाटी बिक्री केन्द्रबाट मात्रै दैनिक औसतमा दुइ सय सिलिण्डर ग्यास (एसटीसी ग्यास) उपभोक्ताले पाइरहेका छन् । उपभोक्ताहरु खाली सिलिण्डर लिएर जाँदा ग्यास छ भने सोही दिन र नभएमा ग्यास आउने दिन (भोलिपल्ट, पर्सिपल्ट) को कुपन दिएर पठाउने गरिएको कर्पोरेशनले जनाएको छ ।
कर्पोरेशनको कालिमाटी बिक्री केन्द्रमा भेटिएका एक कर्मचारीले भने, ‘सुरु सुरुमा चाहिँ खाली सिलिण्डर लिएर आउनासाथ ग्यास दिन्थ्यौँ, दिनको १५०, २ सय, २५० हुँदै ३ सयसम्म जान थालेपछि चाहिँ चाप बढेका कारण कुपन दिएर पठाउन थालेका हौँ ।’
साल्ट ट्रेडिङको कालिमाटी बिक्री कक्षमा ग्यास लिन पुगेका उपभोक्ताहरु पनि ग्यास पाइनेमा ढुक्क देखिने गरेका छन् । आफू लामो समयदेखि एसटीसी ग्यासको उपभोक्ता रहेको बताउने एक जना सेवाग्राहीले बिजनेश पानासँग बताएअनुसार कुपन प्रणालीले सहज बनाएको छ । ‘म शनिबार आएर सोमबारका लागि कुपन लिएर गएको, आज आउनासाथ ग्यास पाइयो’ उनले भने ।
कुपन लिनका लागि खाली सिलिण्डर लिएर बसेका उपभोक्ताले पनि कुपन प्रणालीले ‘ग्यास पाइँदैन कि’ भन्ने चिन्ता हटेको बताएका छन् । कर्पोरेशनले आउनु भनेको दिन कुपन बोकेर आउदा सहजै ग्यास पाइने भएकाले कुपन सिस्टम आफूलाई प्रभावकारी लागेको सोल्टीमोडबाट आएका एक जना उपभोक्ताले बिजनेश पानासँग बताए । ‘खाली सिलिण्डर छोडेर कुपन लिएर गएपछि ग्यास पाउने ढुक्क हुँदो रहेछ’ ति उपभोक्ताले भने, ‘कुपन सिस्टम मलाई चाहिँ राम्रो लाग्यो । पहुँच हुनेले जति पनि पाउने र नहुनेले नपाउने अवस्था आउन नदिन सरकारले सबैतिर कुपन सिस्टम लागू गर्न सके राम्रो हुन्थ्यो ।’
यस्तो छ बिक्रीको अवस्था
साल्ट ट्रेडिङ कर्पोरेशनको कालिमाटी बिक्री कक्षबाट मात्रै होइन, अन्य बिक्री युनिटबाट पनि ग्यास बिक्री हुन्छ । कालिमाटीबाट भने एसटीसी ग्यास मात्रै बिक्री वितरण हुन्छ ।
कर्पोरेशन व्यवस्थापनले उपलब्ध गराएको तथ्याङ्क अनुसार साउन २१ देखि ३१ गतेसम्म दैनिक औसतमा २ सय सिलिण्डर ग्यास कालिमाटी बिक्री कक्षबाट मात्रै वितरण भएको छ । साउन २१ गते २३५ सिलिण्डर, २२ गते १७८ सिलिण्डर, २३ गते १७३ सिलिण्डर र २४ गते २१२ सिलिण्डर ग्यास बिक्री भएको छ ।
यस्तै, साउन २५ गते १८६, साउन २६ गते २६०, साउन २७ गते २०४ र साउन २८ गते १८२ सिलिण्डर ग्यास बिक्री गरिएको कर्पोरेशनको तथ्याङ्क छ । यसैगरी, साउन २९ गते १३६, साउन ३० गते २२२ र साउन ३१ गते १५९ सिलिण्डर ग्यास बिक्री भएको साल्ट ट्रेडिङको तथ्याङ्क छ ।
