एलपी ग्यास उद्योग संघले एक महिनाका लागि पुग्ने ग्यास मौज्दात छ भने नयाँ ग्यासका लागि लाइन नबस्न उपभोक्ताहरुलाई अनुरोध गरेको छ । संघले उपभोक्ताहरुका लागि एक अपिल जारी गर्दै जोसँग कम्तीमा एक महिना पुग्ने ग्यास मौज्दात छ, सो वर्गहरूले तत्काल लाइन नबसेर सहयोग गरिदिन अनुरोध गरेको हो ।
आयात नियमित हुदाँ पनि बजारमा ग्यास अभाव देखिएको सम्बन्धमा ध्यानाकर्षण भएको जनाउँदै संघले बिक्रेताले उपलब्ध भएको ग्यास आम उपभोक्ताहरूलाई प्राथमिकतामा राखेर पारदर्शी र व्यवस्थित ढंगले वितरण गर्ने, उद्योगहरूले पनि पारदर्शि र व्यवस्थित ढंगले बजारमा ग्यास पठाउने र निगमले पनि बजार सहज नहुन्जेल नियमित भन्दा बढी ग्यास आयात गर्ने कार्यमा इमानदार भएर लागेमा बजार सहज हुने जनाएको छ ।
संघले यसअघि आधा सिलिण्डर (७.१ केजी) ग्यास मात्र उपलब्ध गराइँदाको असर अहिले देखिएको भन्दै लामो समय आधा सिलिण्डरको प्रयोग हुनु र आम उपभोक्ताहरूमा ग्यास पाईंदैन कि भन्ने सोचले सबै खाली सिलिण्डरहरू एकै पटक भर्न खोज्दा समस्या देखिएको जनाएको छ ।
मासिक करिब ४५ हजार मेट्रिक टन ग्यास खति हुँदै आएकोमा आधा सिलिण्डर ग्यास मात्रै बजार पठाउँदा (विगत ४ महिनाको अवधि) नियमित खपत भन्दा कम आयात भएको र अहिले भरी सिलिण्डर बजार पठाउने नीति लागू हुँदा माग बढ्न गई समयमै ग्यास नपाउने समस्या देखिएको पनि संघले जनाएको छ ।
