आज नुवाकोटमा दुर्घटनाग्रस्त हेलिकप्टर १५ महिना अगाडी एउटा ठूलो दुर्घटनाबाट जोगिएको थियो । आज २०८१ साउन २३ गते एयर डाईनेस्टीको 9N- AJD रजिष्ट्रेशन नम्बर रहेको हेलिकप्टर नुवाकोटमा दुर्घटनाग्रस्त भएको हो।
यहि हेलिकप्टर गतवर्ष काठमाडौँमा ठूलो दुर्घटनाबाट जोगिएको थियो । २०७९ चैत्र २५ गते काठमाडौंको ह्याम्स अस्पतालमा उक्त हेलिकप्टर दुर्घटनामा परेको थियो । त्यस समय अस्पतालको छतमा रहेको हेलिप्याडमा अवतरणका क्रममा हेलिकप्टरको पछाडिको पुच्छरको पंखा खुस्किएको थियो । हेलिकप्टरको पंखा नजिकैको घरको छानामा खसेको थियो। त्यस समय हेलिकप्टरको पुच्छरको भाग ठोक्किएर दुर्घटना भएको थियो । घटनामा कोही पनि घाइते नभए पनि हेलिकप्टरको टेल रोटर भने भाँचिएको थियो । ठूलो दुर्घटनाबाट सो हेलिकप्टर जोगिएको थियो ।
आज भने सो हेलिकप्टर नुवाकोटमा दुर्घटनाग्रस्त भएको हो । काठमाण्डौ विमानस्थलबाट स्याफ्रुबेशी ( रसुवा जिल्ला) का लागि ४ जना यात्रु (चिनिया नागरिक) सहित उडान गरेको सो हेलिकप्टर उडान गरेको ३ मिनेट पछि काठमाण्डौ टावरसंग सम्पर्क विच्छेद भएको नागरिक उड्डयन प्राधिकरणले जनाएको छ ।
प्राधिकरणका अनुसार सो हेलिकप्टर नुवाकोट जिल्ला शिवपुरी गाउँपालिका वडा नं. ७ सुर्याचौर भन्ने स्थानमा दुर्घटनामा परेको पुष्टि भएको छ । दुर्घटनाको खवर प्राप्त हुनासाथ उद्धार कार्यका लागि प्रभु हेलिकप्टर कम्पनिको 9N-ANL हेलिकप्टर दुर्घटनास्थल तर्फ प्रस्थान गरिसकेको प्राधिकरणले जनाएको छ ।
