आर्थिक वर्ष २०८३÷०८४ बाट विद्युतमा मूल्य अभिवृद्धि कर (भ्याट) लाग्दैछ । अर्थात्, साउन १ गतेबाट बिजुलीमा बजेटमा घोषणा भए अनुसारको भ्याट लागू हुँदैछ ।
यसअघि जेठ १५ गते संसदमा आर्थिक वर्ष २०८३÷०८४ को बजेट प्रस्तुत गर्दै अर्थमन्त्री डा. स्वर्णिम वाग्लेले बिजुलीमा भ्याट लगाउने घोषणा गरेका थिए । जस अनुसार आन्तरिक राजस्व विभागले यसको तयारी सम्पन्न गरेको छ । साथै, बिलिङ गर्ने निकाय नेपाल विद्युत प्राधिकरणले पनि यसका लागि आफूलाई तयारी अवस्थामा राखेको छ ।
उपभोक्तालाई ५, अन्यलाई १३ प्रतिशत
घरायसी उपभोक्ताले अब विद्युत खपतमा ५ प्रतिशतका दरले भ्याट तिर्नुपर्नेछ । यस अनुसार अब मासिक ५० युनिटभन्दा बढी विद्युत खपत गर्ने घरायसी ग्राहकले ५० युनिटभन्दा माथिको खपतमा भ्याटसमेत जोडेर महशुल तिर्नुपर्नेछ ।
‘साउनबाट लागू हुने भएकाले हामीले तयारी अन्तिम चरणमा पुर्याएका छौँ । साउनको बिल भदौमा हुने भएकाले बिलिङ गर्ने बेलासम्म सबै तयारी सक्छौँ’ प्राधिकरणका निमित्त कार्यकारी निर्देशक दीर्घायु कुमार श्रेष्ठले भने ।
सरकारले बिजुलीमा भ्याट लगाउने भनेपनि यसअघिसम्म प्राधिकरण आफैँ भने भ्याटमा दर्ता थिएन । अहिले भने प्राधिकरणलाई पनि भ्याटमा दर्ता गराउनका लागि आवश्यक प्रक्रिया अघि बढाइसकिएको निमित्त कार्यकारी निर्देशक श्रेष्ठ बताउँछन् ।
साथै, घरायसी बाहेकका ग्राहकले भने १३ प्रतिशत भ्याट तिर्नुपर्नेछ । आन्तरिक राजस्व विभागले घरायसी ग्राहकलाई मात्रै अन्तिम उपभोक्ताका रुपमा ब्याख्या गर्दै बाँकी सबैले १३ प्रतिशत भ्याट तिर्नुपर्ने व्यवस्था गरेको हो । विद्युत प्राधिकरणले आन्तरिक राजस्व विभागसँगको परामर्श, छलफल र उसले गरेको ब्याख्या अनुसारकै बिलिङ प्रणाली विकास गरिसकेको बताइएको छ ।
यस आधारमा औद्योगिक तथा व्यवसायिक ग्राहकले १३ प्रतिशत भ्याट तिर्नुपर्ने भएको छ । सरकारी कार्यालय, संस्थान, सरकारी तथा निजी अस्पताल र विद्यालयसहित उद्योग तथा ब्यापारिक प्रतिष्ठान वा फर्म सबैले १३ प्रतिशत नै भ्याट तिर्नुपर्ने भएको छ । यति मात्रै होइन, सिँचाइ, खानेपानी, सडकबत्ती, चार्जिङ स्टेशन, होटल तथा रेष्टुरेन्ट लगायतलाई पनि १३ प्रतिशत नै भ्याट लगाइएको छ ।
