सरकारले अनिश्चितकालको लागि सार्वजनिक यातायातको दर्ता रोक्का गरेको छ । यातायात व्यवस्था विभागले जेठ ७ गते यस सम्बन्धि पत्राचार गरेको हो।
पत्रमा सार्वजनिक यातायातको वैज्ञानिक व्यवस्थापन हुन नसकेका कारण अत्याधिक वायू प्रदुषण, सवारीको चाप र ट्राफिक जाम बढ्न गई आवागमनमा कठिनाई उत्पन्न भएको उल्लेख छ। इन्धनको बढ्दो मूल्यका कारण सार्वजनिक सवारी तथा यातायातमा पर्न गएको असहजता र कठिनाईको सम्बोधन गर्न सार्वजनिक सवारीको यथोचित व्यवस्थापन गर्नुपर्ने उल्लेख गरिएको छ।
“सवारी तथा यातायात व्यवस्था ऐन, २०४९ को दफा २४ को उपदफा (३) मा वातावरण प्रदूषण, सवारीको चाप, सडकको स्थिति, सवारी आवागमनमा पर्ने कठिनाई वा यस्तै अन्य कारणले गर्दा सार्वजनिक हितको लागि कुनै किसिमको सवारी साधनको दर्ता रोक्का गर्न मनासिव देखेमा विभागले कुनै वा सबै यातायात व्यवस्था कार्यालयलाई त्यस्तो सवारीको दर्ता रोक्का गर्न आदेश दिन सक्ने ” व्यवस्था भएको हुँदा सोहि बमोजिम विभागले सार्वजनिक यातायातको दर्ता रोक्का गर्ने निर्णय गरेको हो।
सार्वजनिक हित एवं नेपाल सरकारले सार्वजनिक सवारीको वैज्ञानिक व्यवस्थापन गर्ने उद्देश्यले अर्को सूचना जारी नगरे सम्म तत्कालका लागि ऐनको दफा १४ बमोजिम गरिने दर्ता रोक्का भएको हो । पालिकाबाट गरिने सार्वजनिक सवारी साधनहरुको (इलेक्ट्रिक सार्वजनिक सवारी साधन समेत) नयाँ दर्ता समेत रोक्का गरिएको छ ।
विभागले सबै प्रदेशका यातायात हेर्ने मन्त्रालय र देशभर स्थानीय तहलाई यसबारे पत्राचार गरेको छ।
