राष्ट्रिय स्वतन्त्र पार्टीकी सांसद विदुषी राणाले मुलुकको अर्थतन्त्रलाई बलियो बनाउन अवैध ब्यापार रोक्नुपर्ने बताएकी छिन् । उनले अवैध रुपमा हुने आयात र दर्ता बिना नै चलिरहेका उद्योगहरु बन्द गर्न माग समेत गरेकी छिन् ।
संसदको अर्थ समिति सदस्यसमेत रहेकी उनले अर्थ समितिको बैठकमै मुलुकको अर्थतन्त्र बलियो बनाउन अवैध व्यापार र बिना दर्ता चलेका उद्योगहरूमाथि कडा निगरानी गर्न सरकारसँग माग गरेकी हुन् । सांसद राणाले छिमेकी देशहरुबाट हुने तस्करी अर्थतन्त्रको मुख्य समस्याका रुपमा रहेको बताउँदै अहिले देशभित्रै दर्ता बिना चलेका उद्योगहरुले समेत चुनौती थपेको बताईन् । यी दुबै समस्याबाट राज्यको राजस्व र श्रमिकको अधिकारमा हानी पुगिरहेको उनको भनाइ छ ।
सांसद राणाले अर्थ, गृह र उद्योग मन्त्रालयका अधिकारीहरु सम्मिलित ‘प्रभावकारी संयुक्त अनुगमन संयन्त्र’ विकास गर्न माग पनि गरेकी छिन् ।
