महिला उद्यमी महासंघ नेपालको आयोजनमा शुक्रबारदेखि नवौं अन्तरराष्ट्रिय महिला उद्यमी व्यापार मेला ललितपुरको हेरिटेज गार्डेनमा शुरु भएको छ । ३ दिनसम्म चल्ने मेलाको उद्घाटन उपराष्ट्रपति रामसहाय यादवले गरेका छन् ।
मेलाको उद्घाटनमा यादवले महिला उद्यमशीलतामार्फत आफ्नो क्षमता विकास गर्दैगर्दा परिवारदेखि समाज र राष्ट्रिय अर्थतन्त्रलाई मजबुत बनाउन मद्दत पुगेको बताए । स्थानीय स्रोत साधनको भरपुर उपयोग, स्थानीयस्तरमा रोजगार सिर्जना पनि उत्तिकै सहयोग पुगेको उनले बताए । घरायसी काममै सीमित रहेका महिला अहिले आफ्नै उद्यम हुँदै औद्योगिक प्रतिष्ठानमा पनि सहभागिता बढेको यादवले बताए ।
महासंघकी अध्यक्ष दर्शना श्रेष्ठले नेपाली महिला उद्यमीको उत्सव रहेको बताइन् । यो मेला महिला उद्यमी र उनीहरूको उत्पादन राष्ट्रिय तथा विश्व बजारसम्म पुर्याउने सेतु पनि रहेको उनको भनाइ छ । उत्पादनका साथसाथै प्रविधिको उच्चतम प्रयोग गर्दै पहुँच, ब्रान्ड र बजारीकरणमा थप काम र सहकार्य आवश्यक रहेको श्रेष्ठले बताइन् । महिलाका उत्पादनलाई वर्षभरी नै किनमेल गर्न सकिने गरि महिला शोरुम तथा स्थायी स्टल पनि उपलब्ध गराउन सरकारसँग आग्रह उनले गरिन् ।
मेलामा ३०० महिला उद्यमीका स्टलहरू रहेका छन् । रैथाने तथा मौलिक वस्तु तथा उत्पादनहरू मेलामा राखिएका छन् । मेलामा महासंघले २ जना महिला उद्यमीलाई सम्मान गरेको छ । मधेश प्रदेश सर्लाहीका महिला उद्यमी निर्मला महतो र महिला उद्यमी तथा नेपाल उद्योग वाणिज्य महासंघका पूर्वअध्यक्ष भवानी राणालाई प्रदान गरिएको छ ।
