नेपाल आयल निगमले हवाई इन्धनको मूल्य बढाएको छ । निगमले आज रातिदेखि लागु हुने गरि हवाई इन्धनको मूल्य बढाएको हो।
निगमले आन्तरिकतर्फको हवाई इन्धनको मूल्य प्रति लिटर १२४ रुपैयाँ र अन्तराष्ट्रिय तर्फको हवाई इन्धनको मूल्य प्रति किलोलिटर ८१९ डलरले बढाएको हो। भारतबाट बढेर आएपछि निगमले मूल्य बढाएको हो । निगमका अनुसार भारतबाट हवाई इन्धन प्रति लिटर १२३.८ रुपैयाँ बढेर आएको छ। हवाई इन्धनको मूल्य बढेसंगै अब हवाई भाडा पनि बढ्ने छ ।
भारतबाट डिजेल र पेट्रोलको मूल्यमा भारी वृद्धि भएर आएको छ। भारतबाट पेट्रोलको मूल्य प्रति लिटर ४१.६० रुपैयाँ र डिजेलको मूल्य प्रति लिटर ९४.९३ रुपैयाँ बढेर आएको निगमले जनाएको छ। खाना पकाउने ग्यास प्रति सिलिन्डर १९०.३६ रुपैयाँ बढेर आएको निगमले जनाएको छ।
भारतबाट बढेर आएपनि निगमले डिजेल, पेट्रोल र ग्यासको मूल्य बढाएको छैन ।
