प्रधानमन्त्री पुष्पकमल दाहालले आज शुक्रबार विश्वासको मत लिंदै छन् । उनले सरकारको नेतृत्व गरेको १८ महिनाको अवधिमा पाँचौं पटक संसदबाट विश्वासको मत लिँन लागेका हुन् ।
कांग्रेस र एमालेले सत्ता साझेदारीका लागि सातबुँदे सहमति गरेर एमाले लगायतका दलले सरकारलाई दिएको समर्थन फिर्ता लिएपछि प्रधानमन्त्रीले विश्वासको मत लिन लागेका हुन् । संविधानको धारा १०० (२) मा ‘प्रधानमन्त्रीले प्रतिनिधित्व गर्ने दल विभाजित भएमा वा सरकारमा सहभागी दलले आफ्नो समर्थन फिर्ता लिएमा ३० दिनभित्र प्रधानमन्त्रीले विश्वासको मतका लागि प्रतिनिधिसभासमक्ष प्रस्ताव राख्नुपर्नेछ’ भन्ने व्यवस्था छ ।
यद्यपि अल्पमतमा परिसकेका उनले विश्वासको मत नपाउने निश्चित छ । २७५ सदस्यीय प्रतिनिधिसभामा बहुमतका लागि १३८ मत चाहिन्छ ।
विश्वासको मत नपाएपछि उनी स्वत पदमुक्त हुने छन् । त्यसपछि नयाँ सरकार गठनको प्रक्रिया अघि बढ्ने छ । प्रधानमन्त्रीको रुपमा केपी शर्मा ओलीलाई प्रधानमन्त्री बनाउने गरि आज नै कांग्रेस र एमालेले नयाँ सरकारको लागि दाबी पेश गर्ने तयारी गरेका छन् ।
