सोमबारदेखि नेपालमा वर्षा हुने क्रम कम हुने भएको छ। जल तथा मौसम विज्ञान विभागका अनुसार नेपाल नजिक भएको मनसुन न्यून चापिय रेखा असार २४ गते सोमबारदेखि क्रमिकरुपमा दक्षिण तिर सर्दै जाने भएकोले नेपालमा मनसुनको सकृयतामा कमी आइ वर्षाको मात्रामा केही कमी आउने छ।
यद्यपि सोमबार देखि केही दिन कोशी र गण्डकी प्रदेशका अधिकांश स्थानहरूमा हल्का देखि मध्यम वर्षा र थोरै स्थानहरूमा भारी वर्षाको सम्भावना रहेको छ। मधेश प्रदेश, बागमती प्रदेश, लुम्बिनी प्रदेश, कर्णाली प्रदेश तथा सुदुरपश्चिम प्रदेशका केही स्थानहरूमा हल्का देखि मध्यम वर्षाको संभावना रहेको छ।
सो रेखा नेपाल नजिक भएकोले नेपालमा मनसुन सक्रिय हुने जानकारी विभागले असार २३ सम्म सतर्कता अपनाउन असार २० गते मनसुन विशेष मौसम बुलेटिन जारी गरेको थियो ।
वर्षाको कारण भू-क्षय, पहिरो तथा गेग्रान बहाव (debris flow) को जोखिम रहेको, खहरे खोलाहरूमा पानीको सतह बढ्न सक्ने, दैनिक जन-जीवन, कृषि, स्वास्थ्य, पर्यटन,सडक तथा हवाई यातायात समेत प्रभावित हुन सक्ने भएकोले आवश्यक सतर्कता तथा पूर्व तयारी अपनाउन सर्वसाधारण तथा सबै सरोकारवाला निकायहरूमा विभागले अनुरोध गरेको छ।
