भारतीय क्रिकेट टिमको मुख्य प्रशिक्षकमा गौतम गम्भीर नियुक्त भएका छन् । भारतीय क्रिकेट बोर्ड बिसीसीआईका सचिव जय शाहले गम्भीरलाई भारतीय क्रिकेट टिमको मुख्य प्रशिक्षकमा नियुक्त गरिएको जानकारी दिएका हुन् ।
गम्भीर भारतीय क्रिकेट टिम कै पूर्व खेलाडी हुन् । उनी ओपनर ब्याट्सम्यान थिए । सन् २०११ मा भारतले दोस्रो पटक एक दिवशीय क्रिकेट विश्वकपको उपाधि जित्दा उनले ९७ रनको योगदान गरेका थिए । फाइनल खेलमा उनको ९७ रन उच्चतम स्कोर थियो । सन् २००७ मा भारतले टि २० विश्व जित्दा पनि उनले सर्वाधिक ७५ रनको योगदान दिएका थिए ।
उनकै कप्तानीमा कोलकाता नाइट राइडर्सले सन् २०१२ र २०१४ को आईपीएलको उपाधि जितेको थियो । सन् २०२४ मा कोलकाता नाइट राइडर्सले आईपीएलको उपाधि जित्दा उनी टिमको मेन्टर थिए । ४२ वर्षीय गम्भीर साढे ३ वर्ष मुख्य प्रशिक्षक रहने छन् । यद्यपि उनीसँग आईपीएल टिम बाहेक कुनै पनि राष्ट्रिय टिमलाई प्रशिक्षकण दिएको अनुभव छैन ।
यस अघि राहुल द्राभिड टिमको मुख्य प्रशिक्षक थिए। उनको कार्यकाल टि २० विश्वकपसम्म मात्र थियो । उनकै नेतृत्वमा भारतले टि २० विश्वकप जितेको हो ।
