माछापुच्छ्रे क्यापिटलले मङ्सिर १४ गतेदेखि खुलामुखी सामुहिक लगानी योजनाको इकाई निष्काशन गर्दै छ। क्यापिटलले माछापुच्छ्रे म्युचुअल फण्ड अन्तर्गत संचालन हुने गरि माछापुच्छ्रे एसआईपी योजना नामको खुलामुखी सामुहिक लगानी कोष योजनाको इकाई निष्काशन गर्न लागेको हो ।
यस योजनाको आकार ५० करोड रहेको छ। तर पहिलो चरणमा २० करोड रुपैयाँ बराबरको २ करोड इकाई निष्काशन हुन लागेको हो । २ करोड इकाई मध्ये १५ प्रतिशत अर्थात् ७५ लाख इकाई माछापुच्छ्रे बैंक र माछापुच्छ्रे क्यापिटललाई छुट्याईएको छ । जसमा बैंकले १४ प्रतिशत र क्यापिटलले १ प्रतिशत इकाई लिने छ।
बाँकि रहेको १ करोड २५ लाख इकाई सर्वसाधारणमा निष्काशन हुन लागेको हो । यसमा न्युनतम १०० इकाई र अधिकतम २० लाख इकाईको लागि आवेदन दिन सकिने छ। छिटोमा मङ्सिर १७ गतेसम्म र सो अवधिसम्म पर्याप्त आवेदन नपरेमा ढिलोमा मङ्सिर २८ गतेसम्म आवेदन दिन सकिने छ।
यसै प्रसङ्गमा बिजनेशपानाले योजनाबारे माछापुच्छ्रे क्यापिटलका प्रमुख कार्यकारी अधिकृत उपेन्द्र मालाकारसँग कुराकानी गरेको छ।
माछापुच्छ्रे एसआईपी योजना कस्तो खालको फण्ड हो ?
यस “माछापुच्छ्रे एसआइपि योजना” एक खुलामुखी योजना हो । यस योजनाको कुल आकार ५० करोडको रहेको छ र यस मध्ये प्रथम चरणमा सार्वजनिक रुपमा २० करोडका लागि बिक्रि खुल्ला गरिनेछ ।
यसबाट संकलित रकम के मा र कसरी लगानी गरिन्छ?
यसबाट संकलित रकम नेपाल धितोपत्र बोर्डमा दर्ता भएका धितोपत्र, सार्वजनिक निष्काशन भएको धितोपत्र साथै मुद्रा बजार उपकरण, मुद्दति निक्षेप तथा ऋणपत्रहरुमा लगानी गरिन्छ । यस योजनाले दीर्घकालिन प्रतिफल हासिल गर्ने लक्ष्य सहित आधारभुत विश्लेषणबाट मजबुत देखिएका धितोपत्रहरुमा लगानी गर्दछ ।
अहिले बजारमा रहेका खुलामुखी म्युचुअल फण्डको तुलनामा यो फण्ड के हिसाबमा फरक छ ?
माछापुच्छ्रे एसआइपि योजना एक सन्तुलित योजना हो । यसमा SIP, Lump Sum, DRIP र SWP सुविधा रहेकोछ । यो योजना value investing मा केन्द्रित रहँदै जोखिम र प्रतिफलबीच सन्तुलन कायम गरी दीर्घकालिन प्रतिफल हासिल गर्ने उद्देश्य राख्नेछ ।
यस फण्डमा लगानी गर्ने लगानीकर्ताले कहिलेबाट र कति प्रतिफलको अपेक्षा गर्न सक्छन्?
यो खुलामुखी योजना भएकोले लगानीकर्तालाई आफ्नो लगानीको मूल्य (NAV) बढेसँगै लाभांश मार्फत प्रतिफल दिनेछ । यस योजनाको १० वर्षको प्रक्षेपित वार्षिक औसत प्रतिफल १३ प्रतिशत रहेको छ ।
अहिले बजारमै १० रुपैयाँ भन्दा कमका खुलामुखी म्युचुअल फण्ड छन्, सस्तो फण्ड छोडेर १० रुपैयाँमा माछापुच्छ्रे फण्ड किन किन्ने ?
खुलामुखी योजनाहरुको कारोबार दैनिक खुद सम्पत्ति मुल्य (NAV) मा हुने गर्दछ । योजनाको सुरुवाती चरणबाटै सहभागी हुने अवसर लगानीकर्ताहरुले पाउँने छन्, साथै नियमित लगानी, दिर्घकालीन प्रतिफलको उद्देश्य प्राप्त गर्नका लागि माछापुच्छ्रे एसआइपि योजना उपयुक्त योजना हो।
कस्ता लगानीकर्तालाई यो फण्ड उत्तम हुन्छ ?
साना लगानीकर्ता, तलबी व्यक्तिहरु, अवकाश प्राप्त तथा पेन्सनधारी व्यक्तिहरु जो नियमित लगानी गरि दीर्घकालीन प्रतिफल हासिल गर्न चाहने लगानीकर्ताहरुलाई यो योजना उत्तम हुन्छ ।
३ महिनापछि सहजै फण्डको इकाई खरिद बिक्रीको लागि कस्तो योजना छ ?
यस योजना अनलाइन प्लेटफर्म, मोबाइल एप्लिकेशन साथै विभिन्न पेमेन्ट गेट्वे सँग सहकार्य गरि योजनाको सहज कारोबार गराउँदछौं ।
अन्त्यमा, लगानीकर्ताहरुलाई के सन्देश दिन चाहनुहुन्छ ?
पूँजी बजारको प्रतिफल मुद्रा बजारको तुलनामा निकै बढी रहेको परिस्थितीमा नियमित तथा व्यवस्थित तरिकाले लगानी गर्दै दीर्घकालीन प्रतिफल हासिल गर्नका लागि “माछापुच्छ्रे एसआइपि योजना” मा लगानी गर्नको लागि आग्रह गर्दछौं।
