चालु आर्थिक वर्षको ११ महिना (श्रावणदेखि जेठसम्म) मा नेपालको ब्यापार घाटा १६ खर्ब रुपैयाँ नाघेको छ । भन्सार विभागले सार्वजनिक गरेको साउनदेखि जेठ सम्मको वैदेशिक ब्यापारको तथ्याङ्क अनुसार नेपालले ११ महिनामा १६ खर्ब १६ अर्ब ब्यापार घाटा ब्यहोरेको हो ।
यस अवधिमा १८ खर्ब ९४ अर्ब रुपैयाँ बराबरको वस्तु तथा सेवा आयात हुँदा निर्यात भने २ खर्ब ७७ अर्बमा सिमित भएको छ ।
गत आर्थिक वर्षको ११ महिनामा नेपालको ब्यापार घाटा १३ खर्ब ९७ अर्ब थियो । यस वर्षको सोही अवधिमा ब्यापार घाटा १५.६७ प्रतिशतले बढेको भन्सार विभागको तथ्याङ्क छ ।
