नेपालमा एमजी गाडीको आधिकारिक बिक्रेता पारामाउण्ट मोटर्सले एमजीको बहुप्रतिक्षित विद्युतीय एसयुभी एस–५ नेपाल ल्याउँदैछ । कम्पनीका अनुसार एस–५ भन्सार नाकामा आइपुगेको छ । नाकाबाट केही दिनमै गाडी नेपाल आइपुग्ने बताइएको छ ।
शोरुममा गाडी आइपुग्नासाथ बुकिङ खुलाउने तयारीमा पारामाउण्ट मोटर्स छ । ‘प्योर इलेक्ट्रिक प्लेटफर्म’मा निर्माण भएको ‘एस–५’लाई लिएर कम्पनी निकै आशावादी पनि देखिएको छ । नेपालमा ‘ईभी कल्चर’को जग बसाएको दाबी गर्ने एमजीले एस ५ लाई ‘एडभान्स सुपेरियर फिचर्स’द्वारा सुसज्जित रहेको दाबी गरेको छ ।
निकै प्रतिक्षा गरिएको एस ५ कहिलेसम्म आइपुग्ला ? यसका विशेषता के कस्ता छन् ? मूल्य के कति कायम रहला ? भन्ने विषयमा केन्द्रित रहेर बिजनेश पानाले पारामाउण्ट मोटर्सका जनरल म्यानेजर सुनिल क्षेत्रीसँग कुराकानी गरेको छ । प्रस्तुत छ कुराकानीको सम्पादित अंशः
भन्सार नाकामा आइपुग्यो भनिएको एमजीको बहुप्रतिक्षित विद्युतीय एसयुभी एस–५ कहिलेसम्म शोरुममा आइपुग्ला ?
स्याम्पल युनिट भन्सारमा आइपुगेको छ । हिउँ परेको कारणले त्यहाँबाट आउन केहि दिन ढिलो हुन गएपनि आउँदो हप्तासम्म गाडी आइपुग्छ । हामीले गाडी आइसकेपछि मार्चको पहिलो हप्ताभित्र लन्च गर्ने तयारी गरेका छौँ । मार्चको ६ तारिख, ७ तारिख तिर लन्च गर्ने तयारी छ ।
यो गाडीको फिचर्समा मान्छेहरुको चासो छ, यसका विशेषता के कस्ता छन् ?
एस–५ प्योर इलेक्ट्रिक प्लेटफर्ममा बनेको गाडी हो । प्राविधिक भाषामा भन्नुपर्दा modular scalable platform (एमएसपी प्लेटफर्म) भन्ने गरिन्छ । प्रविधिका हिसाबले एस–५ लाई कनेक्टटेड–इन्टेलिजेन्ट गाडी पनि भन्छौँ । मुख्य कुरा, ५० देखि ६० लाखको रेन्जका गाडीहरुमा यो गाडी निकै एडभान्स गाडी छ । यो रेन्जका अन्य प्रायः सबै गाडीहरु ‘फ्रन्ट ह्वील ड्राइभ’ छन्, एस–५ चाहिँ पहिलोपटक ‘रियर ह्वील ड्राइभ’मा आउँदैछ । ‘रियर ह्वील ड्राइभ’का गाडीको ड्राइभिङ डायनामिक एकदमै राम्रो हुन्छ । यो कुरा चलाएर हेरेपछि अनुभूति हुन्छ ।
यसको मोटर पछाडीको चक्कामा हुन्छ । सजिलो उदाहरण दिनुपर्दा, उकालोमा कुनै चिज तान्नुभन्दा ठेल्नु सजिलो हुन्छ । यो गाडीमा पनि पछाडीको चक्कामा पावर लाग्ने भएकाले उकालोमा चार वटै चक्कामा एकैपटक समान पावर लाग्छ । जसका कारण उकालोमा गाडी नतान्ने र चक्का घुम्ने समस्या हुँदैन । नेपालको बाटोघाटो उकालो, अफरोड खालको बढी हुने भएकाले यो गाडी यस्तो सडकमा पनि मजाले हिड्न सक्छ ।
अर्को कुरा, यो रेन्जको गाडीमा हरेक चक्कामा इन्डिपेन्डेन्ट सस्पेन्सन पनि पहिलोपटक प्रयोग भएको छ । यसमा भएको इन्डिपेन्डेन्ट सस्पेन्सनले खाल्डाखुल्डीमा पनि गाडीलाई स्टेबल बनाएर ब्यालेन्स राख्न मद्दत गर्छ र जसका कारण ड्राइभिङ कन्फर्ट हुन जान्छ ।
यसको २ भेरियन्टमा १७ र १८ इन्चको टायर छ । १७ इन्चको टायरमा १७५ एमएम ग्राउण्ड क्लियरेन्स छ भने १८ इन्चको टायरमा १८० एमएम ग्राउण्ड क्लियरेन्स छ ।
अर्को कुरा चाहिँ हामीले यस गाडीलाई इन्टेलिजेन्ट र कनेक्टटेड भनेका छौँ । इन्टेलिजेन्स यसकारण भनिरहेका छौँ कि, कुनै कारणबस ड्राइभर निदायो वा थाक्यो भने सेन्सरले सेन्स गरेर ‘आर्लाम’ लगाइदिन्छ ।
कनेक्टटेड किन भन्छौँ भने, यसको टच स्क्रिनमै युट्युब, टिकटक, च्याट जीपीटी र स्पोर्टीफाइ गरेर ४ वटा एप हुन्छ । यी एपहरु स्वतः अपडेट पनि हुन्छन् । साथै, प्रतिमहिना ५ सय एमबी डेटा पनि उपलब्ध हुन्छ । समग्रमा, प्योर ईभी प्लेटफर्ममा बनेको यस एसयूभी भित्र बस्दा सुरक्षा, लक्जरियस र मनोरञ्जन प्राप्त हुन्छ ।
तपाईहरुले गाडी ल्याउने समयमै अरु पनि ब्राण्डका नयाँ भेरियन्ट आउँदैछन् । उपभोक्ताले एस–५ नै किन रोज्ने ?
बजारमा प्रतिस्पर्धा भनेको भइ नै रहन्छ, प्रतिस्पर्धा हुनु पनि पर्दछ । हामीले ५० किलोवाट ब्याट्री प्याकको सेग्मेन्ट हेर्छौँ, यो सेग्मेन्टमा धेरै ठूलो प्रतिस्पर्धा छ । अहिले विभिन्न ब्राण्डका नयाँ भेरियन्टहरु पनि यो सेग्मेन्टमा थपिँदैछन् ।
अब, एमजी एस–५ नै किन त ? यो प्रश्न स्वभाविक रुपमा आउन सक्छ । एमजी भनेको इतिहास बोकेको, विरासत बोकेको कम्पनी हो । केही महिना अगाडी मात्रै १०० वर्षको उत्सव बनायौँ । यो कुनै स्टार्टअप कम्पनी होइन । उपभोक्ताहरुले यो कुरा एकदमै बुझ्नु भएको छ, यसकारण एमजीप्रति उपभोक्ताको विश्वास छ । अर्को कुरा, एमजीले जति पनि प्रोडक्ट ल्याएको छ, ति सबैको विकास, डिजाइन र सुरक्षामा कुनै सम्झौता गर्दैन । सबै प्रोडक्ट ‘प्रुभल प्रोडक्ट’हरु हुन् ।
सँगै, एस–५ चीन बाहिर पहिलोपटक नेपालमा आउँदैछ । युरोप, अष्ट्रेलिया, यूके लगायतका देशमा ठूलो माग हुँदाहुँदै पनि चीनबाहिर पहिलोपटक हामी ल्याउँदैछौँ । यो हाम्रो लागि खुशीको कुरा पनि हो । साथै, उपभोक्ताहरुले बिक्री पछिको सेवा पनि हेरेर निर्णय लिनुपर्छ । बिक्री पछिको सेवाका लागि हामीसँग पर्याप्त दक्ष जनशक्ति हुनुहुन्छ । नेपालमा मास सेलिङमा ईभीको बिक्री सुरु गर्ने कम्पनी भएको हुनाले हामीले उत्पादन गरेका जनशक्ति ईभीको मर्मतसम्भारका लागि दक्ष छन् ।
सँगै, पार्टसहरुका लागि पनि सहज छ । हामी भारतसँग पनि कनेक्टटेड छौँ । यसकारण नेपाली उपभोक्ताहरुले एमजी एस–५ मजाले टेस्ट ड्राइभ गरेर ढुक्क भएर लिन सक्नुहुन्छ ।
नेपालको ईभीको मास सेलिङ सुरु गरेको एमजीको अहिले बजारमा उपस्थिति अलि खस्किएको हो कि भन्ने पनि सुनिन्छ । अब एस–५ ले मजबुत उपस्थिति देखाउनेमा कम्पनी कत्तिको आशावादी छ ?
हामीले अघि पनि कुरा गर्यौँ, एमजी भनेको बिरासत बोकेको कम्पनी हो । यसले प्रोडक्ट ल्याउँदा नै निकै मेहनत गरेर डिजाइनदेखि सुरक्षा सम्मलाई ध्यान दिएर ल्याउँछ ।
नेपाली बजारमा हाम्रो ‘जेडएस’ सफल भयो । एमजी जेडएस हिरो गाडी रह्यो, रहनेछ । जेड एसलाई आइसी प्लेटफर्ममा ईभी बनाइएको थियो । उपभोक्ताले ‘अप–ग्रेड’ चाहने भएकाले उहाँहरु नयाँ भेरियन्टतर्फ आकर्षित हुनु स्वभाविक पनि हो । नेपाली उपभोक्ताहरु नयाँ कुराको अनुभव लिन डराउनु हुन्न । तर, ‘फ्रेस प्रोडक्ट’ आउँदा बजारमा मजबुत उपस्थिति जनाउन सकिँदो रहेछ भन्ने उदाहरण त जेडएस ईभीले देखाइसकेको छ ।
जहाँसम्म एस–५ सँग कम्पनीको आशाको कुरा छ, हामीले निकै ठूलो अपेक्षा गरेका छौँ । यसका विशेषता र कम्पनीको बिरासतका कारण एस–५ नेपाली उपभोक्ताको रोजाइमा पर्ने र मास सेलिङमा गजबको उपस्थिति रहनेमा ढुक्क पनि छौँ ।
बुकिङ कहिले सुरु गर्ने तयारी छ ? नेपाली बजारमा एस–५ को मूल्य के कति तोकिएला ?
हामीले गाडी आएपछि बुकिङ लिने भनिरहेका छौँ । ठ्याक्कै मिति तय भइसकेको छैन, यद्यपी हामी यसबारे छलफल गरिरहेका छौँ ।
एस–५ को मूल्यको कुरा गर्दा चाहिँ ३ भेरियन्ट र विभिन्न ७ वटा कलरमा उपलब्ध हुन्छ । ४९ किलोवाटका २ वटा र ६२ किलोवाटको एउटा भेरियन्ट छ । ४९ किलोवाटका २ भेरियन्टमध्ये एउटाको मूल्य ५० लाखभन्दा तल हुन्छ भने अर्कोको मूल्य ५५ लाखभन्दा तल हुन्छ । ६२ किलोवाटमा उपलब्ध हुने गाडीको मूल्य चाहिँ ६० लाखभन्दा केही तल हुन्छ भन्ने देखिएको छ ।
ब्याट्री वारेन्टी र डिस्पोजको कुरामा कम्पनीहरु ध्यान दिँदैनन् भन्ने आरोप पनि छ । यसमा पारामाउण्ट कत्तिको सचेत छ ?
हामीले जहिल्यै पनि उपभोक्ताको विश्वासलाई नै ध्यान दिएर प्रोडक्ट ल्याउँछौँ, एमजीले बनाउँदा नै यी कुराहरु ध्यान दिन्छ । सामान्यतया, सबै ईभीमा ब्याट्रीको वारेन्टी ८ वर्षको हुन्छ ।
हामीले ब्याट्री बिग्रियो वा फेर्नुपर्ने भयो भने पूरानो ब्याट्रीको पनि केही मूल्य गाडीधनीले प्राप्त गर्न सकुन् भनेर भारतीय कम्पनीसँग सम्झौता नै गरेका छौँ । हाम्रा गाडीको ब्याट्री बिग्रिएर फेर्नुपर्ने अवस्था आएमा पूरानो ब्याट्री भारतको ‘लोहाम’ कम्पनीले लैजान्छ । ब्याट्रीको ‘हेल्थ एण्ड कण्डिशन’ हेरेर गाडीधनीले केही मात्रामा पैसा पनि पाउँछन् । हामीले उपभोक्ताको सहजता र नेपालको वातावरणलाई हेरेर यो सम्झौता गरेका हौँ ।
अन्तिममा, एमजीका सर्भिस नेटवर्कहरु कति छन् ?
चार्जिङ प्वाइन्टको कुरा गर्दा १७ वटा डीसी चार्जर जडान भइसकेको छ । ‘सिस्टर कन्सर्न’सँग मिलेर थप विस्तार गर्दैछौँ ।
डिलर्समै सर्भिस सेन्टर पनि राख्ने हाम्रो नीति अनुरुप हालसम्म हाम्रा १३ वटा डिलर्सहरु सर्भिस सेन्टरसहित तयार भएका छन् । अन्य जुनसुकै ठाउँमा गएर सेवा दिन पनि हाम्रा जनशक्ति तयार छन्, दक्ष र सक्षम छन् ।
