सरकारले सुनको भन्सार बढाएको विरोधमा सुनचाँदी व्यवसायी र कालीगढहरूले विरोध प्रदर्शन गरेका छन्। संयुक्त सुनचाँदी व्यवसायी तथा कालीगढ संघर्ष समितिको आयोजनामा उनीहरुले आज आइतबार काठमाडौंको माइतीघर मण्डलमा विरोध प्रदर्शन गरेका हुन् ।
उनीहरूले विगत १४ वर्षदेखि लागु गरिएको सुनको सिण्डिकेटको विरुद्द प्रदर्शन गरेका हुन् । साथै हालै सुनमा बढाईएको भन्सार वृद्धिको विरोध गरेका हुन् । गत जेठ १५ मा प्रस्तुत भएको आर्थिक वर्ष २०८१/८२ को बजेटले सुनमा भन्सार दर १५ प्रतिशतबाट बढाएर २० प्रतिशत पुर्याएको छ। जसको कारण सुनको मूल्य बढेर उच्च बिन्दुमा पुगेको छ ।
प्रदर्शनको क्रममा उनीहरुले सुनमा लागाईएको सिन्डिकेट खारेज गर्न, अव्यावहारिक रुपमा सुनमा बढाईएको भन्सार दर खारेज गर्न तथा सुनचाँदी व्यवसायी र कालिगढमैत्री नीति निर्देशिका र ऐन तुरुन्त जारी गर्न माग गरेका छन् ।
