अहिले देशभरी नै निर्वाचनको मतपरिणामबारे कौतुहलता छ । दलका कार्यकर्ता मात्रै होइन, आम सर्वसाधारण पनि कुन दलले कहाँ जित्दैछन् भनेर चासोका साथ हेरिरहेका छन् ।
अहिले इन्टरनेटको पहुँच बढेको कारण सर्वसाधारणहरु सामाजिक सञ्जालबाटै मत ‘अपडेट’ लिइरहेका छन् । दलका कार्यकर्ताले पनि सामाजिक सञ्जालबाटै अपडेट दिइरहेका छन् ।
मिडियाहरुले पनि सामाजिक सञ्जाल पेजहरुमार्फत निर्वाचनको मतगणनाबारे जानकारी उपलब्ध गराइरहेका छन् ।
अहिले देशब्यापी रुपमा इन्टरनेटबाट चुनावी अपडेट लिने र दिने काम भइरहे पनि इन्टरनेट सेवा प्रदायकहरुले इन्टरनेटको खासै खपत नबढेको बताएका छन् । इन्टरनेट सेवा प्रदायकहरुको संस्था आइस्पानका अध्यक्ष सुधिर पराजुलीका अनुसार अहिले सामाजिक सञ्जाल मात्रै बढी चलेकाले खासै इन्टरनेटको खपत बढेको छैन ।
‘सोसियल मिडियाको प्रयोग बढेको हुनाले यसमा लोकल सर्भर यूज हुने हो’ उनी भन्छन्, ‘यसकारण इन्टरनेटको खपत खासै बढेको छैन, नर्मल नै छ ।’
फेसबुक, युट्युब, टिकटक लगायतका सामाजिक सञ्जालहरु चलाउँदा लोकल ब्याण्डविथ प्रयोग हुने भएकाले सामाजिक सञ्जालको प्रयोग बढ्दैमा इन्टरनेटको खपत नबढ्ने जानकारहरु बताउँछन् ।
