चालु आर्थिक वर्ष २०८२/८३ को ८ महिनासम्ममा नेपालले १२ खर्ब ८९ अर्ब २५ करोड रुपैयाँ बराबरको बस्तु तथा सेवा आयात गरेको छ । गत आर्थिक वर्षको सोहि अवधिको तुलनामा आयात १२.५४ प्रतिशतले बढेको हो । गत आवको पहिलो ८ महिनामा ११ खर्ब ४५ अर्ब ५६ करोड रुपैयाँ बराबरको बस्तु तथा सेवा आयात भएको थियो ।
आयातसंगै नेपालको निर्यात पनि बढेको छ । चालु आवको ८ महिनासम्ममा निर्यात २०.८३ प्रतिशतले बढेको हो । चालु आवको ८ महिनासम्ममा १ खर्ब ९१ अर्ब ११ करोड रुपैयाँको बस्तु तथा सेवा निर्यात भएको छ । गत वर्षको सोहि अवधिमा यस्तो निर्यात १ खर्ब ५८ अर्ब १७ करोड रुपैयाँको भएको थियो ।
यो अवधिमा १४ खर्ब ८० अर्ब ३६ करोड रुपैयाँको वैदेशिक व्यापार भएको छ। गत आवको सोहि अवधिको तुलनामा यो १३.५५ प्रतिशत बढी हो । गत आवको सोहि अवधिमा नेपालको वैदेशिक व्यापार १३ खर्ब ३ अर्ब ७३ करोड रहेको थियो ।
समग्रमा २०८२ फागुन महिनासम्ममा नेपालको ब्यापार घाटा १० खर्ब ९८ अर्ब १३ करोड रुपैयाँ रहेको छ । जुन गत आवको सोहि अवधिको तुलनामा ११.२२ प्रतिशत बढी हो । गत आवको पहिलो ८ महिनामा ९ खर्ब ८७ अर्ब ३९ करोड रुपैयाँ व्यापार घाटा रहेको थियो।
