नबिल बैंकले चालु आर्थिक वर्ष २०८२/८३ को दोस्रो त्रैमासको अपरिस्कृत वित्तीय विवरण सार्वजनिक गरेको छ। बैंकले आज प्रकाशित गरेको अपरिस्कृत वित्तीय विवरण अनुसार गत आर्थिक वर्षको यस अवधिको तुलनामा बैंकको खुद नाफा ४६.७१ प्रतिशतले बढेको छ।
चालु आर्थिक वर्षको पुस मसान्तसम्ममा बैंकले ४ अर्ब ७५ करोड खुद नाफा कमाएको छ । गत आर्थिक वर्षको पुस मसान्तसम्ममा बैंकले ३ अर्ब २४ करोड खुद नाफा कमाएको थियो ।
यस अवधिमा बैंकको खुद ब्याज आम्दानी ७ अर्ब ८९ करोडबाट बढेर ८ अर्ब ८ करोड पुगेको छ भने खुद फि तथा कमिशन आम्दानी १ अर्ब ५१ करोडबाट बढेर १ अर्ब ६१ करोड पुगेको छ । यस अवधिमा बैंकले सम्भावित जोखिमको लागि छुट्याएको इम्पेयर चार्ज रिभर्स हुँदा बैंकको संचालन मुनाफा २६.९५ प्रतिशतले बढेर ६ अर्ब ५७ करोड पुगेको छ।
पुस मसान्तसम्ममा बैंकको प्रतिशेयर नेटवर्थ २३५ रुपैयाँ ६४ पैसा रहेको छ। बैंकको प्रति शेयर आम्दानी ३५.०४ रुपैयाँ रहेको छ ।
पुस मसान्तसम्ममा बैंकको वितरणयोग्य मुनाफा ७३.०२ प्रतिशतले बढेर ३ अर्ब २७ करोड पुगेको छ। यस अवधिमा बैंकको वितरणयोग्य प्रतिशेयर आम्दानी २२.५० रुपैयाँ पुगेको छ।
३२ अर्ब ५ करोड चुक्ता पूँजी रहेको बैंकको जगेडा कोषमा ३६ अर्ब ७० करोड रुपैयाँ सञ्चित छ । बैंकले दोस्रो त्रैमासको अन्त्यसम्ममा ५ खर्ब ६६ अर्ब निक्षेप संकलन गरी ४ खर्ब ३४ अर्ब रुपैयाँ कर्जा प्रवाह गरेको छ ।
