चालु आर्थिक वर्षको ११ महिनाको अवधिमा वाणिज्य बैंकहरुले ५३ अर्ब बढी खुद नाफा कमाएका छन् । नेपाल राष्ट्र बैंकको पछिल्लो तथ्यांक अनुसार संचालनमा रहेका २० वाणिज्य बैंकहरुले २०८१ साउन देखि २०८२ जेठसम्मको अवधिमा कुल ५३ अर्ब ९७ करोड ३४ लाख रुपैयाँ खुद नाफा कमाएका हुन् ।
अघिल्लो आर्थिक वर्षको यसै अवधिको तुलनामा बैंकहरुको खुद नाफा ४.९७ प्रतिशत घटेको छ । अघिल्लो आर्थिक वर्षको यसै अवधिमा वाणिज्य बैंकहरुले ५६ अर्ब ७९ करोड खुद नाफा कमाएका थिए।
चालु आर्थिक वर्षको ११ महिनाको अवधिमा नबिल बैंकले सबैभन्दा धेरै ६ अर्ब ४० करोड खुद नाफा कमाएको छ। त्यस्तै ग्लोबल आईएमई बैंकले ६ अर्ब ३ करोड, तथा नेपाल इन्भेष्टमेन्ट मेगा बैंकले ५ अर्ब ६८ करोड खुद नाफा कमाएको छ।
यस अवधिमा कुमारी बैंकको खुद नाफा सबैभन्दा कम अर्थात् ३७ करोड १० लाख रहेको छ। त्यस्तै एनआईसी एशिया बैंकले ८२ करोड ९७ लाख खुद नाफा कमाउँदा हिमालयन बैंकले ९० करोड ५३ लाख खुद नाफा कमाएका छन् । अन्य बैंकको खुद नाफा भने अर्ब माथि रहेको छ ।
२०८१ जेठसम्मको र २०८२ जेठसम्मको अपरिस्कृत खुद नाफा तुलना गर्दा प्रतिशतको आधारमा ११ वटा बैंकको खुद नाफा घटेको छ। जस मध्ये कुमारी बैंकको खुद नाफा ७७.८४ प्रतिशत घटेको छ भने हिमालयन बैंकको खुद नाफा ६७.२७ प्रतिशत घटेको छ। त्यस्तै एनआईसी एशिया बैंकको खुद नाफा ६२.८८ प्रतिशत घटेको छ ।
२०८१ जेठ सम्मको र २०८२ जेठसम्मको अपरिस्कृत खुद नाफा तुलना गर्दा प्रतिशतको आधारमा नेपाल बैंकको खुद नाफा सर्वाधिक १८५.२७ प्रतिशत बढेको छ । त्यस्तै नेपाल इन्भेष्टमेन्ट मेगा बैंकको खुद नाफा २९.८३ प्रतिशत तथा एभरेष्ट बैंकको खुद नाफा २८ प्रतिशत बढेको छ ।
हेर्नुस् आर्थिक वर्ष २०८०/८१ र २०८१/८२ को पहिलो ११ महिनामा वाणिज्य बैंकको खुदनाफाको तुलनात्मक विवरण । रकम रु. १० लाखमा देखाईएको छ।
